O presidente da Xunta inaugura UNVEX 2021 este mércores en Santiago

O presidente da Xunta de Galicia, Alberto Núñez Feijoo, inaugurará este 7 de xullo na Cidade da Cultura de Santiago de Compostela a sexta edición de UNVEX, evento de referencia estatal e internacional no ámbito do vehículos aéreos non tripulados e as tecnoloxías de control, monitoraxe e análise da información que os acompañan. En UNVEX participarán unha chea de empresas internacionais, estatais e galegas (como por exemplo Marine Instruments, o Centro Tecnolóxico Gradiant, Aerocamaras, UAV Works, Cartogalicia, Aeromedia e o Instituto Tecnolóxico de Galicia).
Volvendo á inauguración, Feijóo estará acompañado pola secretaria de Estado de Defensa, Esperanza Casteleiro; o conselleiro de Economía, Francisco Conde, o director xeral de Industria e PEME, Galo Gutiérrez, e o director xeral de Armamento e Material do Ministerio de Defensa, almirante Santiago González; entre outros altos representantes de institucións, empresas e universidades.
O punto de referencia do evento será a Cidade da Cultura de Santiago de Compostela, do 7 ao 9 de xullo este escenario será o eixo do evento. No edificio CINC celebrarase o ciclo de conferencias con máis de 120 relatores de diferentes nacionalidades que se repartirán en 24 sesións especializadas. A asistencia confirmada é de máis de 200 congresistas diarios e máis de 300 profesionais vía streaming. Todo, informa a organización, “cumprindo os requisitos que esixe a normativa, con aforamentos reducidos en tres auditorios, con estritas normas de control de acceso e sempre baixo rexistro previo e cunha controlada hixiene sanitaria”.

Ángel Macho e Patricia Argerey (GAIN) na presentación da nova edición de UNVEX

O Museo Gaiás acollerá eses mesmos días a área expositiva con máis de 70 empresas de todo o mundo. Os asistentes poderán ver as últimas novidades de compañías como as internacionais Indra, General Atomics, Airbus, Babcock, Boeing, SENER Aeroespacial ou Everis; o galegas Marine Instruments, Gradiant, Aerocamaras, UAV Works, Cartogalicia, Aeromedia e ITG (Instituto Tecnolóxico de Galicia); ou as nacionais Aertec, Alpha Unmanned e Fada-Catec.
A mobilidade de localizacións chegará coas demostracións, as terrestres poderanse ver en Santiago, pero para ver os drons marítimos a organización levará aos asistentes ata Pontevedra, concretamente á Escola Naval Militar de Marín, e os aéreos e os sistemas antidrons mostraranse en Lugo, no Centro de Investigación Aeroportada de Rozas (CIAR), situado no aeródromo de Rozas, onde se atopa tamén o Polo Aeronáutico de Galicia da Civil UAVs Iniciative promovido pola Axencia Galega de Innovación (GAIN) na localidade de Rozas.
UNVEX é un evento integral, nacido en 2010, que xa ten ás súas costas cinco edicións celebradas en Europa máis catro realizadas en América Latina. Deseñado e desenvolvido por IDS, que tamén conta cun medio de difusión referente no sector, www.infodron.es, pasa por achegar a meirande mostra de vehículos aéreos non tripulados de cantas se realizan en España e as súas demostracións inclúen todo tipo de sistemas remotamente tripulados.