O primeiro smartphone con Ubuntu será dun fabricante español

Dende Ubuntu levan un tempo traballando en incorporar unha versión da súa distribución de Linux en smartphones, como unha alternativa a Android que podería ofrecer unha experiencia moi diferente ao que estamos afeitos, e que por fin poderemos ver nun terminal comercial e incluso asumible, xa que Canonical decidiu confiar na compañía española Bq para lanzar o primeiro smartphone con Ubuntu, que vén a ser unha edición do popular Bq Aquaris E4.5 que venderase a 169.90 euros e que incluso vai estar dispoñible a través de operadores telefónicos (no caso español, aparte da compra libre, o smartphone poderá mercarse a través de Amena).
O Aquaris E4.5 Ubuntu Edition ten unha pantalla de 4,5 polgadas (cunha resolución de 960 x 540 píxeles), procesador MediaTek de catro núcleos a 1,3 GHz, 1 GB de RAM, 8 GB de almacenamento interno, cámaras de 8 e 5 Mpíxeles e dobre SIM, ou sexa, un produto ao que nos ten afeitos Bq, e que inicialmente só se venderá en Europa, e que parece unha saída desesperada tras a imposibilidade de conseguir financiamento para o smartphone Ubuntu Edge, que perseguía a estrea de Ubuntu nos móbiles cun terminal de alta gama, o que parece un compromiso demasiado elevado para un sistema operativo cun futuro máis que discutible.

Vídeo de presentación do smartphone con Ubuntu