O programa Único levará a banda larga a 40.289 fogares e empresas de Pontevedra
xoves, 26 de xaneiro do 2023
O
programa de banda larga do Goberno (Plan Único) para levar Internet
ultrarrápida ás zonas que non contan con este servizo (poñendo o
foco no rural e nas zonas brancas), vai
dotar de Rede de alta capacidade a 40.289 fogares e empresas da
provincia de Pontevedra. Asi o corroboran este mércores 25 de
xaneiro a secretaria de Estado de Telecomunicacións, María González
Veracruz, e o delegado do goberno en Galicia, José Miñones, durante
unha xuntanza, na sede da Deputación de Pontevedra, coa presidenta
provincial, Carmela Silva, e con case medio cento de alcaldes e
outros responsábeis municipais.
Na
xuntanza González e Miñones presentáronlles os plans do Goberno
para a extensión de fibra óptica no territorio. No encontro, ao que
tamén asistiu a subdelegada en Pontevedra, Maica Larriba, deuse a
coñecer o impacto dos investimentos en dixitalización que está a
executar o Goberno a través do Ministerio de Asuntos Económicos e
Transformación Dixital, nestes concellos.
Esta
acción, como dixemos, forma parte do Programa Único-Banda Larga,
dentro do Plan de Recuperación, Transformación e Resiliencia do
Goberno e permitirá que nas dúas primeiras convocatorias (2021 e
2022) se conecten a internet de alta velocidade 40.289 fogares e
empresas da provincia cun investimento global de 16.166.245 euros dos
que o Goberno aporta 11.116.777.
No
conxunto de Galicia, entre as dúas convocatorias xa resoltas, o
programa está a levar a conexión a Internet de alta velocidade a
226.725 fogares e empresas cun investimento global de 107.136.930
euros, dos que o Goberno aporta 71.262.165 euros.
Único-Banda
Larga diríxese a dotar dunha taxa de cobertura de moi altas
capacidades ao 100% da poboación española en 2025. Unha vez se
executen os proxectos beneficiarios xa postos en marcha, a taxa de
cobertura alcanzará o 95%.
Ata
o momento lanzáronse dúas convocatorias deste programa (en 2021 e
2022). A de 2021 foi adxudicada integramente a Telefónica en
Galicia. A de 2022, ás empresas Vento Rede (para a provincia da
Coruña), Adamo Telecom (para a provincia de Lugo) e Avatel Telecom
(para as provincias de Ourense e Pontevedra).
Miñones
e González salientaron que “dende 2018 o Goberno mobilizou máis
de 1.500 millóns de euros de investimento público-privado para
levar conexións de banda larga ultra rápida a máis de catro
millóns de fogares e empresas”.
No
caso de Galicia os fogares e empresas beneficiados atópanse en
‘zonas brancas’, aquelas que non dispoñen de cobertura de redes
de velocidade de polo menos 30 Mbps, nin plans para a súa dotación
nos próximos tres anos.
“A
conectividade é un elemento básico para garantir a supervivencia
dos pequenos concellos; é unha arma contra o despoboamento”,
sinalaron, salientando que “o Goberno de Pedro Sánchez están
dando o paso para garantir o 100% de cobertura de acceso a Internet
de alta velocidade en todo o territorio galego, favorecendo a
conectividade a máis de 300 Mbps naquelas zonas que hoxe non
dispoñen deste tipo de cobertura, esencial no mundo actual”.