O proxecto para a dixitalización do comercio do rural ourensán obtén a máxima puntuación para os Next Generation
venres, 7 de xaneiro do 2022
O
proxecto CROu para a dixitalización e sustentabilidade do comercio
rural, deseñado pola Deputación de Ourense, vén
de obter a máxima puntuación de toda España na convocatoria dos
fondos Next Generation do Plan de Recuperación, Transformación e
Resiliencia xestionado polo Ministerio de Industria, Turismo e
Comercio.
Trátase
dun plan que involucra a 18 concellos da provincia e que aposta, en
palabras do presidente Manuel Baltar, “pola actividade comercial en
zonas de reto demográfico, facilitando o acceso a novos canais de
comercialización e procurando un papel activo dos empresarios do
sector na educación dixital dos seus clientes, que na meirande parte
dos casos son persoas de avanzada idade”.
Baltar,
cualificou de “excelente noticia” a avaliación do proxecto CROu
nunha convocatoria á que se presentaron 312 proxectos de
administracións locais e provinciais de toda España.
O
proxecto CROu contará cun orzamento de preto de 260.000 euros
co-financiados nun 70 % polos fondos europeos e comezará a
executarse en febreiro, estendéndose ao longo deste ano. Aplicarase
en concellos das comarcas de Celanova (A Bola, Cartelle, Celanova,
Gomesende, A Merca, Padrenda, Pontedeva, Quintela de Leirado, Ramirás
e Verea); Trives (Chandrexa de Queixa, Manzaneda, Pobra de Trives e
San Xoán de Río); e Viana (A Gudiña, A Mezquita, Viana do Bolo e
Vilariño de Conso). As máis de 400 actividades comerciais nestes 18
concellos (Datos do IGE de 2019) poderán beneficiarse dunha ou
varias accións previstas no programa.
Como
dixemos, CROu procura a transformación dixital do comercio rural,
poñendo en práctica recursos para captar e manter clientes,
ofertándolles unha canle dixital como elemento complementario mais
“sen perder as vantaxes e oportunidades do comercio local, como o
acceso ao produto de quilómetro 0 ou a proximidade e atención
directa”.
Trátase
dun proceso en boa medida orientado ao consumidor local, pero “que
tamén permitirá a determinados perfís de comercio rural abrirse a
novos mercados, expandirse e mesmo optimizar o seu stock”, explican
fontes da Deputación, engadindo que “facilitará a colaboración
entre comercios de diferentes concellos, demostrando ao cliente que
mercar en local é posíbel, doado e adaptativo”.
Para
contribuír aos obxectivos de transformación dixital e
sustentabilidade local, o proxecto poñerá ao dispor dos comercios
un soporte de venda online para ter os seus produtos aloxados
nunha canle dixital común e permitir a compra en varias tendas e
realizar un único pago.