O remake de Resident Evil 4 estrea demo

O agardado remake de Resident Evil 4 chegará ao mercado o vindeiro día 24, e para que os seus potenciais compradores poidan saber se poden apostar por esta revisión do xogo de 2005 (con mecánicas de xogo renovadas e gráficos de última xeración) ofrecen dende hoxe a Resident Evil 4 Chainsaw Demo, para PC (Steam), Xbox Series X|S, PS4 e PS5.
A demo do novo Resident Evil 4 permítenos controlar a Leon S. Kennedy nos seus primeiros pasos nunha arrepiante vila, sen límite de tempo, para que poidamos introducirnos ao noso ritmo nesta experiencia mellorada que busca cativar aos seareiros da franquía, que na súa maioría gardan un grande recordo do xogo orixinal, que non só foi importante para a saga, senón que incluso marcou unha liña a seguir no seu xénero.