O rexistro mercantil británico permítenos coñecer os malos resultados económicos de X

Edificio no que ten oficinas xAI en Londres

X/Twitter experimentou unha caída do 66,3% nos seus ingresos no Reino Unido durante 2023, o primeiro ano completo tras a adquisición por parte de Elon Musk. Os beneficios antes de impostos tamén se afundiron un 74%, pasando de 5,6 a 1,2 millóns de libras esterlinas. Esta información coñécese agora grazas a que a compañía presentou as contas esta semana no rexistro mercantil británico, atribuíndose o retroceso nos resultados á perda de investimento publicitario por preocupacións arredor da «seguridade da marca e/ou a moderación de contidos».
A empresa admitiu estar adoptando medidas para recuperar a confianza dos anunciantes, como o desenvolvemento de ferramentas de seguridade e programas de educación publicitaria. Con todo, os resultados foron cualificados como «un descenso significativo no rendemento» (ao pasar duns ingresos de 205,3 millóns de libras esterlinas en 2022 a só 69,1 millóns de libras en 2023).
A situación interna da compañía tamén mudou radicalmente. O número de empregados de X/Twitter no Reino Unido reduciuse de 399 a 114, incluíndo unha perda de 173 postos no departamento de investigación e desenvolvemento. Estes recortes forman parte dunha reestruturación máis ampla que deixou o cadro de persoal global en só 1.500 persoas, fronte ás 8.000 que tiña antes da compra por parte de Musk.