O sistema intelixente EMi chega ás oficinas de emprego de Ferrol e Vilalba

luns, 12 de xuño do 2023 S. P.

Ferrol e Vilalba acolleron este luns 12 de xuño a presentación das vantaxes e melloras postas en xogo polas novas oficinas de emprego, que, entre outras novidades, estrean un sistema de Intelixencia Artificial (EMi) que permitirá mellorar os axustes entre as ofertas e as demandas de traballo.
Na presentación (celebrada nas oficinas Ferrol-Centro e Vilalba) participaron a conselleira de Promoción de Emprego, María Jesús Lorenzana, e a directora xeral de Formación e Colocación, Zeltia Lado. Segundo fixeron saber, as novidades implantadas pola Consellería nas dependencias do Servizo Público de Emprego de Galicia tamén pretenden dar resposta ás necesidades de persoal traballador do tecido produtivo, e ofrecer, a través dun novo programa, unha atención personalizada aos colectivos con maiores dificultades.
A titular de Promoción do Emprego destacou as vantaxes da nova ferramenta tecnolóxica EMi (Emprego Intelixente), baseada na Intelixencia Artificial, que permitirá “axustar en tempo real as demandas de man de obra do tecido produtivo aos perfís das persoas demandantes rexistradas polo servizo público”. Esta solución, que se está a implantar con carácter piloto en tres oficinas (Cambados, Pontevedra e Ordes), estenderase ao resto de oficinas de emprego da comunidade autónoma. “Trátase”, tal e como subliñou Lorenzana, “de aproveitar as posibilidades que brindan a IA e a analítica avanzada para favorecer a xeración de máis e mellor emprego en Galicia”.
EMi, engadiu, permitirá ás empresas publicar as súas vacantes de forma múltiple e simultánea no Servizo de Emprego e, de xeito gratuíto, noutros portais de emprego e, así, chegar a un maior número de candidatos. O novo instrumento conta cun navegador competencial, para que os orientadores podan obter información sobre as competencias asociadas ás ocupacións; un emulador de ocupacións para buscar o emprego idóneo para cada demandante de emprego; e un recomendador de formación.
A titular de Promoción do Emprego, doutro lado, incidiu en que o Goberno autonómico está a fixar a atención nas persoas usuarias destas oficinas que presentan maiores problemas para atopar traballo. Así, sinalou que a Xunta está a implentar, para iso, o novo programa de seguimento intensivo da demanda de emprego para axudar e apoiar de xeito máis personalizado a aquelas persoas inscritas no Servizo Público de Emprego de Galicia que presentan dificultades para atopar un traballo co obxectivo de integralas o antes posible no mercado de traballo.
Para levar a cabo esta iniciativa, a principios de ano incorporáronse ás oficinas de emprego 136 novos profesionais (4 destinados en Ferrol e un en Vilalba) que están a realizar tarefas de orientación e prospección laboral.

PUBLICIDADE