O talento na era 4.0 centrou unha xornada en Santiago
martes, 25 de xuño do 2019
O
pasado 21 de xuño celebrouse en Santiago unha xornada de debate
sobre as tecnoloxías intelixentes. A cita veu da man do Instituto
Galego do Talento (IGATA)
e contou coa presenza dalgunhas das nosas empresas máis
representativas e referenciais en materia de transformación
tecnolóxica.
A
xuntanza, que se desenvolveu baixo o epígrafe O Talento na era
4.0, buscou reunir talentos galegos “coas mesmas
inquietudes”, segundo explicou ao comezo da xornada o responsable
do proxecto IGATA, Ángel Fraga. O evento comezou cunha charla do
responsábel de produto en Amazon España, Francisco Servia, quen
realizou un percorrido polas tecnoloxías desde os inicios de
Internet até a nosa convivencia (nun futuro que xa podemos tocar
coas mans) coas máquinas. Segundo fixo saber Servia, “cómpre
adaptarnos á época na que nos tocou vivir, existen máquinas que
nos superan en diferentes áreas, pero é necesario cambiar o vello
argumento de que aquí as cousas sempre se fixeron así, deixando de
lado o noso egocentrismo, para que a convivencia sexa posíbel”.
A
seguinte en tomar a palabra foi a responsábel de Mercadotecnia e
Comunicación en Casa Grande de Xanceda, Jessica Rey, quen expuxo o
seu punto de vista como profesional do tecido de PEME galego e
aproveitou para facer unha proclama a prol de universalizar e
estender as mellores condicións de comunicación e conexión a todas
as zonas non urbanas (neste senso lembrou que empresas como a Casa
Grande de Xanceda están a converterse en referentes empresariais
dende o corazón do noso rural).
Logo
da pausa celebrouse a mesa redonda Oportunidades e retos na
xestión do talento, na que participaron o director financeiro de
Cafés Candelas, Alejandro Álvarez; o director de Procesos Dixitais
e Axilidade Operativa de Abanca, Pablo Mateo; e a presidenta do
Círculo de Empresarios de Galicia, Patricia García. Desta volta,
foi o público o que tomou a palabra e expuxo aos participantes da
mesa redonda as súas inquietudes en canto a formación e orzamentos
nas empresas, a atracción de talento e a súa retención nas
empresas galegas, as necesidades de potenciar as capacidades dos
estudantes desde os colexios, a situación das PEME galegas, etc. Ao
abeiro da mesa, a presidenta do Círculo de Empresarios de Galicia,
Patricia García, explicou as necesidades de formar equipos e facelos
partícipes das decisións da compañía. En canto á atracción do
talento, Pablo Mateo recoñeceu que “hoxe en día son as empresas
as que teñen que venderse para que os candidatos queiran traballar
nelas”. Pola súa banda, Alejandro Álvarez, mostrouse
completamente de acordo co público cando este expuxo a necesidade de
potenciar o talento desde que somos pequenos.