OpenAI amplía as posibilidades da súa tecnoloxía de IA e reduce os seus custos

martes, 7 de novembro do 2023 Marcus Fernández

OpenAI vén de celebrar un evento orientado a desenvolvedores no que deron conta de numerosas novidades que están a preparar para abrir a súa tecnoloxía de intelixencia artificial a moitos máis usos. Entre as novidades destacou o anuncio de GPT-4 Turbo, unha nova versión do modelo de linguaxe GPT-4 lanzado hai poucos meses, que agora é máis capaz ao ter unha fiestra de contexto de 128 mil tokens (o que serían máis de 300 páxinas de texto), aínda que para a meirande parte de desenvolvedores que queiran tirar proveito desta tecnoloxía como servizo resultaralles máis importante saber que conseguiron mellorar o seu rendemento, o que supón unha substancial baixada de prezo.
OpenAI tamén estrea unha API para a creación de novos asistentes, facendo doada a creación de aplicacións que integren un asistente baseado en IA e faga uso das distintas ferramentas que ofrece a compañía de Sam Altman.
A plataforma tamén estrea novas capacidades multimodais, como visión (sendo capaz de interpretar imaxes do mundo real e mesmo ler documentos), creación de imaxes (DALL·E 3 pode integrarse nos chats para a creación de imaxes) e conversión de texto a voz (que comeza con 6 voces moi realistas).

PUBLICIDADE