Oppo pon ao día os seus reloxos

martes, 29 de agosto do 2023 Marcus Fernández

Agora que Wear OS está a converterse nun sistema operativo para reloxos especialmente atractivo por contar cunha aplicación nativa de WhatsApp que permite enviar e recibir tanto mensaxes de texto como de voz, resulta interesante botar un ollo a novos reloxos que funcionan con este sistema operativo desenvolvido por Google, como será o Oppo Watch 4 Pro cando chegue ao noso territorio, estando xa dispoñible para a súa compra en China a un prezo que parte dos 2.299 iuans (291 euros).
Este novo reloxo chega cun procesador Qualcomm Snapdragon W5 Gen 1, 2 GB de RAM, 32 GB de almacenamento interno, pantalla AMOLED de 1,74 polgadas e un brillo de 600 nits, resistencia á auga, sensor de frecuencia cardíaca, sensor de saturación de osíxeno en sangue, electrocardiograma, rexistro da respiración durante o sono, Bluetooth 5.0, Wi-Fi 5, NFC, GPS, eSIM e batería de 570 mAh con carga magnética, polo que podería ser un bo competidor do Samsung Galaxy Watch 6, especialmente no que a autonomía se refire.

PUBLICIDADE