Os 144 números da revista Nós convértense en libro electrónico
venres, 30 de outubro do 2020
Esta mañá presentouse unha iniciativa para acurtar a distancia, botando
man das TIC, entre o importante legado cultural,
artístico, ideolóxico, lingüístico e político da Xeración Nós
e a cidadanía (poñendo especial énfase nas novas xeracións). Máis
polo miúdo, trátase dun proxecto que converteu en libro electrónico
os 144 números da revista Nós, no marco do centenario da publicación.
O
secretario xeral de Cultura, Anxo M. Lorenzo, e a directora da
Axencia para a Modernización Tecnolóxica de Galicia (AMTEGA), Mar
Pereira, presentaron este venres o resultado da dita dixitalización,
que supón, sinalaron, “un paso adiante na difusión nacional e
internacional da publicación ao converter en formato libro
electrónico a totalidade dos exemplares”. Tamén informaron da
vindeira posta en marcha dunha web, revistanos.gal,
que recollerá “todo o universo Nós”, impulsada en orixe
polo ourensán Vicente Risco, coas importantes achegas estéticas e
artísticas do rianxeiro Alfonso Daniel Rodríguez Castelao. Chegou a
contar cos seguintes colaboradores, amais dos devanditos Risco e
Castelao: Fermín Bouza-Brey, Ánxel Fole, Manuel Lesteiro, Luís
Manteiga, Ramón Otero Pedrayo, Luís Pimentel, Emilio Pita, Lois
Tobío Fernández, Alfonso Vázquez Martínez, Teixeira de Pascoaes
(portugués) e Phileas Lebesgue (francés).
O
secretario xeral de Cultura salientou a relevancia desta iniciativa
que supón que Galicia “recupere o legado da Xeración Nós en
clave do século XXI” xa que, como engadiu, “un século despois
do seu nacemento, a revista Nós recupera os seus materias en
formato electrónico para un mellor acceso, acorde coas novas canles
de acceso da información”. Segundo dixo, a novidade do proxecto
vén dada “pola conversión a formato ePub dos 144 números da
revista, 100 dos que xa están preparados e son accesíbeis desde
Galiciana BDG para a súa descarga multicanle”. Trátase, explicou,
“dunha extensión de ficheiro electrónico que permite unha
compatibilidade coa meirande parte de dispositivos electrónicos,
incluíndo redes móbiles”.
Pola
súa banda Mar Pereira sinalou que “o obxectivo desta iniciativa é
poñer a disposición do público en xeral uns contidos de alto valor
cultural, aplicando técnicas innovadoras baseadas na Intelixencia
Artificial, coñecidas como grafo de coñecemento, que permiten
navegar polos contidos da revista e achegarnos ao seus autores modo
de relato histórico enlazando os fitos históricos que marcaron a
súa época”. Tamén fixo saber que “a dixitalización destes
contidos é un paso máis na construción da Memoria Dixital de
Galicia”.
Páxina web
Ademais da conversión en libro electrónico, tamén se adiantaron detalles da nova páxina web revistanos.gal, que recollerá todo o universo da dita publicación permitindo explorar directamente no corpo dos textos da revista, por medio das relacións que se establecen entre os colaboradores na historia da publicación. Así, explicaron, a través dun grafo do coñecemento, inclúense os datos das persoas, lugares, institucións e acontecementos históricos que rodearon á revista durante os seus quince anos de vida. “Este grafo facilitará a busca de documentos específicos para usuarios non expertos”, informaron Lorenzo e Pereira, engadindo que “amais de todo o devandito”, a Biblioteca de Galicia (a través de Galiciana) permite a consulta de todos os números que se publicaron da revista, incluído o último, do que só existen dous exemplares físicos, un deles depositado na Biblioteca da Deputación de Ourense e outro en mans dun particular. De feito, a biblioteca dixital dá acceso ás algo máis de 3.900 páxinas da revista o que reforza a conservación e divulgación deste patrimonio editorial representado por intelectuais da nosa historia recente como Vicente Risco, Castelao ou Otero Pedrayo.