Os 3 primeiros xogos de Phoenix Wright estrean versión HD para iOS

Capcom confirmou hoxe o lanzamento do seu xogo Phoenix Wright: Ace Attorney Trilogy HD para iPhone, iPad e iPod Touch como descarga de balde, incluíndo os 3 primeiros xogos de Phoenix Wright (Ace Attorney, Ace Attorney Justice for All e Ace Attorney Trials and Tribulations) como contido descargable mediante pagamento. Estes xogos combinan a investigación de escenas de crimes con xuízos, nos que o avogado Phoenix Wright terá que resolver numerosos misterios dun xeito bastante peculiar, que fai que estes xogos se convertesen en auténticos referentes no Xapón, onde trunfaron en versión para Nintendo DS, e que agora recupéranse con gráficos actualizados á alta definición.
Para enganchar ao xogador a descarga de balde inclúe os 2 primeiros episodios de Phoenix Wright: Ace Attorney, tendo que pagar 5,49 euros se queremos gozar dos 3 episodios restantes da historia. Os outros 2 xogos da triloxía poden mercarse soltos a 5,99 euros, aínda que os interesados en facerse coa triloxía completa de vez poden mercala por 14,99 euros, o que supón un pequeno aforro.
Entre as curiosidades destes xogos figura un modo Everyone Object que permite que os xogadores poidan comunicarse cos seus amigos collendo aos personaxes e frases do xogo para mandalos por e-mail ou publicalos como unha animación en Twitter. Por desgraza o xogo só está dispoñible polo momento en inglés (o que resulta un tanto raro, posto que os 3 título chegaron a publicarse en español nas súas versións de DS).