Os Diálogos confinados do CCG destacaron o inmenso potencial galego en materia de videoxogos

luns, 1 de xuño do 2020 Sonia Pena

Os días pasados tocou falar de videoxogos e das súas posibilidades presentes e futuras, e tamén do importante talento que atesouramos en Galicia para ser unha potencia no sector. Este foi o fío temático da sexta entrega do ciclo Diálogos confinados do Consello da Cultura Galega, que analizou este ámbito do lecer dixital na compaña de dous representantes do sector na nosa terra: Fernando Prieto, co-responsábel dos referenciais estudios galegos Gato Salvaje, e Carla Bolaños, estudante de mestrado e integrante de Digital Monster Collective, un colectivo multidisciplinar galego. Na cita tamén interveu Manuel Gago, director de Culturagalega.gal.
Durante a conversa abordaron a situación do sector en Galicia desde o punto de vista do potencial creativo existente e reivindicaron a necesidade de crear “estruturas para poder conectar o talento co mercado”.
Fernando Prieto fixo fincapé no “inmenso potencial creativo de Galicia” pero tamén nas eivas: “Falta a estrutura, planificar os proxectos pensando en que teñen que chegar ao mercado” asegurou. Pola súa parte, Carla Bolaños, estudante do mestrado e UX Designer en Digital Monster Collective, achegou o seu punto de vista como estudante e na conversa insistiu “na necesidade de crear vínculos entre a universidade e a empresa”, ademais de apostar polas subvencións como vía para sacar adiante proxectos.
Ambos os dous coincidiron en que a situación actual dificultou o seu traballo. “As redes non funcionan todo o ben que deberían” indicou Fernando e Carla engadiu que “falta a axilidade da reunión presencial”. Porén, dixeron, “este sector ten as fases de traballo moi ben compartimentadas” e, en pouco tempo, puideron ir afacéndose ás novas rutinas e sacar adiante os proxectos.

Vídeo da conversa sobre videoxogos

PUBLICIDADE