Os Realme 5 e Realme 5 Pro seguen a apostar por grandes prestacións e baixo prezo

martes, 20 de agosto do 2019 Marcus Fernández

Agora que xa temos en España o Realme 3 Pro a un prezo que parte dos 199 euros podemos pór a vista nos novos smartphones da marca económica de Oppo que veñen de presentarse na India e que volven ofrecer grandes prestacións a prezos moi axustados.
O modelo de entrada é o Realme 5, que chega cun procesador Qualcomm Snapdragon 665, pantalla de 6,5 polgadas con resolución HD+ e unha pequena pestana superior para a súa cámara frontal de 13 Mpíxeles, cámara traseira cuádrupla con sensor principal de 12 Mpíxeles e unha batería de 5.000 mAh con carga rápida de 10 watts (que, por exemplo, permitiría ver vídeos de YouTube durante 19,1 horas seguidas).
No apartado fotográfico o Realme 5 pode presumir dun ultra grande angular de 119 graos, sensor principal de 12 Mpíxeles, obxectivo orientado aos retratos e un cuarto obxectivo para fotografías tipo macro (a 4 centímetros de distancia). Tamén coidan o software das cámaras, de xeito que incluso conta co cada vez máis frecuente modo nocturno, que mellora as instantáneas tomadas baixo pouca luz.
A nivel estético, o smartphone ten un acabado en cor nano holográfica (azul ou púrpura), que consegue reflexos en distintos ángulos, dándolle unha aparencia elegante, pouco frecuente en dispositivos deste rango de prezo. O Realme 5 tamén ten Wi-Fi AC, Bluetooth 5.0, toma de auriculares, lector de pegadas dixitais traseiro, lector de tarxetas microSD de até 256 GB e resistencia a salpicaduras; e ao mercado da India chega o vindeiro día 27 en 3 configuracións distintas, de 3 GB de RAM e 32 GB de almacenamento, 4 GB de RAM e 64 GB de almacenamento e 4 GB de RAM e 128 GB de almacenamento, a 9.999, 10.999 e 11.999 rupias respectivamente (126, 138 e 151 euros).

Vídeo promocional do Realme 5

Pola súa banda o Realme 5 Pro é un terminal máis ambicioso, moi semellante ao seu irmán pequeno, pero cun procesador Qualcomm Snapdragon 712, pantalla de 6,3 polgadas (curiosamente un chisco máis pequena) cun pequeno espazo superior para unha cámara frontal de 16 Mpíxeles, cámara traseira cuádrupla cun sensor principal de 48 Mpíxeles e unha batería de 4.035 mAh con carga rápida. Temos así unha versión do móbil anterior que principalmente é máis potente (contando incluso cun sistema de optimización para xogos) e dá un importante salto no apartado fotográfico (o seu sensor principal de 48 Mpíxeles ten apertura f/1.8 e un sensor de grande tamaño) pero tamén incrementa o seu prezo, de xeito que chegará ao mercado o 4 de setembro a 13.999 rupias (176 euros) con 4 GB de RAM e 64 GB de almacenamento, a 14.999 rupias (189 euros) con 6 GB de RAM e 64 GB de almacenamento e a 16.999 rupias (214 euros) con 8 GB de RAM e 128 GB de almacenamento. Uns prezos realmente agresivos, que serán un chisco máis elevados cando estes dispositivos cheguen ao mercado europeo nos vindeiros meses, pero que igualmente farán que esteamos ante dispositivos moi atractivos pola súa relación prestacións-prezo e o seu atractivo deseño.

Vídeo promocional do Realme 5 Pro

O Realme 5 Pro coida especialmente o seu apartado fotográfico
Os Realme 5 e Realme 5 Pro funcionan con ColorOS 6 (baseado en Android 9)

PUBLICIDADE