Os Xogos con Gold de setembro destacan polos títulos retrocompatibles

Durante o mes de setembro confírmase a tendencia de Microsoft de coidar os xogos retrocompatibles mentres ofrece títulos recentes menores dentro dos Xogos con Gold, e así vemos como os títulos para Xbox One serán Warhammer: Chaosbane e Mulaka, ou sexa, un xogo de rol de acción de reducido éxito e un xogo independente descoñecido para o grande público.

En contraste, os xogos retrocompatibles que chegarán aos subscritores de pagamento de Xbox LIVE son máis interesantes, comezando co clásico Zone Of The Enders HD Collection (recompilación dos 2 xogos principais da saga creada por Hideo Kojima para Konami) e Samurai Shodown II (un dos xogos de loita máis representativos de Neo Geo). Ambos títulos chegan en versión para Xbox 360 retrocompatibles en consolas posteriores.

O pouco coidado pola selección para Xbox One deixa constancia do interese de Microsoft por deixar de lado Xbox LIVE Gold para potenciar a subscrición do Xbox Game Pass Ultimate.