Os algoritmos evolutivos centran a nova conferencia da UNED no CIA de Ourense
martes, 13 de abril do 2021
- Sede do Centro de Intelixencia Artificial de Ourense, en La Molinera
O
profesor
Enrique Carmona, da UNED é o convidado esta semana no seminario de
IA da sede da Universidade Nacional a Distancia en Ourense,
seminario impulsado por esta institución académica e máis o Centro
de Intelixencia Artificial da cidade das Burgas. O doutor Carmona
falará de algoritmos evolutivos e as súas aplicacións. A cita será
este 16 de abril e poderase seguir en streaming.
No
relatorio o investigador fará unha introdución ao mundo da
Computación Evolutiva, unha rama da Intelixencia Artificial que
aborda a resolución automática de problemas de optimización
mediante o uso dunha serie algoritmos, denominados algoritmos
evolutivos, que están inspirados en diferentes mecanismos da
evolución natural. Durante a presentación analizaranse tamén as
vantaxes e inconvenientes deste tipo de algoritmos e, en
consecuencia, establecerase en que tipos de problemas é aconsellábel
ou non a súa utilización. Finalmente, mostraranse diferentes
exemplos da súa aplicación.
Enrique
J. Carmona é doutor pola UNED e enxeñeiro electrónico pola
Universidade de Granada.
Actualmente,
é profesor titular no Departamento de Intelixencia Artificial da
UNED, onde desempeña labores tanto docentes como investigadoras. No
pasado tamén desenvolveu postos de enxeñeiro en diferentes empresas
privadas. As súas áreas de interese abranguen diferentes
disciplinas, tales como a Computación Evolutiva, a Aprendizaxe
Automática e a Visión Artificial.
Actualmente,
a súa investigación céntrase no procesamento computacional de
imaxe médica e na aplicación dos algoritmos evolutivos a diferentes
dominios (imaxe, matemáticas e deseño automático). É autor de
diferentes traballos de investigación publicados en revistas de alto
impacto.