Os cambios da revolución dixital nos estudos humanísticos, a debate na USC
martes, 10 de outubro do 2017
A Facultade de Filoloxía de Santiago (USC) acolle estes días, até
este mércores 11, unha
xuntanza destinada a alentar o debate arredor dos estudos do
medievalismo e os novos recursos dixitais de coñecemento,
información e comunicación. O congreso internacional
Humanidades Dixitais: olladas cara á Idade Media vén da man
da Rede de Estudos Medievais Interdisciplinares e foi concibido, en
palabras da Rede, “como un espazo aberto a propostas de carácter
transversal e multidisciplinar”. Tocaranse e avaliaranse
metodoloxías, aplicacións prácticas de ferramentas tecnolóxicas
(por exemplo os recursos relacionados coa xeoposición) e estudos
concretos sobre “os cambios que a revolución dixital está a
supoñer nos estudos humanísticos”.
A decana do centro,
María José López Couso, presidiu a sesión inaugural no salón de
graos da Facultade de Filoloxía. O
encontro estenderase como dixemos até o mércores 11 e contará
con varias conferencias plenarias a cargo de figuras destacadas
nestas disciplinas e que proceden de distintas institucións
europeas: Universidade Complutense de Madrid (José Manuel Lucía
Megías), Universidade de Salamanca (Mª Nieves Sánchez González de
Herrero e Leyre Martín Aizpuru), Centre Tecnològic de Catalunya
(Ana Requejo), Agència Catalana del Patrimoni Cultural de la
Generalitat de Catalunya (Albert Sierra), Laboratorio de Innovación
en Humanidades Digitales (LINHD-UNED) e Politécnico do Porto
(Mariana Curado Malta) e da Austrian Academy of Sciences (Mihailo
Popovic).
Acompañando as conferencias preto de trinta
investigadores dos ámbitos estatal e internacional presentarán os
seus traballos en máis de vinte comunicacións, artellados en nove
sesións de distinta temática: a edición dixital, as exploracións
do espazo, a arte e a iconografía ou os recursos dixitais son algúns
dos eixos centrais. Ademais disto, a organización tamén informou de
que se está a reservar un espazo de interacción directa para
presentar seis proxectos co nexo común de pór en práctica
distintas ferramentas das humanidades dixitais. As persoas
interesadas poden acadar máis información na web
www.usc.es/estmedin/hd/.