Os centros de investigación das nosas universidades visitan aos seus homólogos cataláns
mércores, 3 de novembro do 2021
A
Rede de Centros de Investigación do Sistema Universitario de Galicia
(SUG) vén de realizar unha visita a Cataluña, organizada pola
Fundación Universidade-Empresa Galega (FEUGA), a través da cal
mantivéronse sesións de traballo cos integrantes do sistema de
investigación catalán. Esta actividade enmárcase no plan de
traballo da Rede de Centros de Investigación do SUG, iniciativa
impulsada pola Xunta, en colaboración con FEUGA, para “potenciar a
excelencia do sistema de investigación galego e impulsar o seu
posicionamento a nivel nacional e internacional”.
A
delegación galega estivo encabezada polo secretario xeral de
Universidades, José Alberto Díez de Castro e contou coa
participación dos vicerreitores de investigación das tres
universidades galegas (Salvador Naya Fernández da UDC, Vicente Pérez
Muñuzuri da USC e Belén Rubio Armesto da UVigo), o director de
FEUGA, Javier Pereiro, e directores, subdirectores e xestores
principais das entidades que integran a Rede de Centros de
Investigación do SUG.
Estas
entidades, CITIC, CIMUS, CIQUS, CITIUS, CIM, CINBIO e AtlantTIC,
puideron compartir experiencias e coñecer a xestión organizativa e
científica de cinco centros que representan modelos diferentes de
éxito no sistema de investigación catalán: IDIBAPS, I2CAT, ICFO,
CED e ICTA. As sesións contribuíron a ampliar a relación de
contactos dos centros e a situar á Rede de Centros de Investigación
do SUG no panorama nacional.
A
Rede de Centros de Investigación do SUG está integrada polos
centros de investigación do Sistema Universitario de Galicia
acreditados como tales pola Consellería de Cultura, Educación e
Universidade: CITIC (UDC); CIMUS, CIQUS, CITIUS, IGFAE (USC); e CIM,
CINBIO e AtlantTIC (UVigo). Está concibida como un foro de
reflexión, expresión e intercambio de ideas entre estes centros
universitarios e a Secretaría Xeral de Universidades, e constitúe
unha ferramenta fundamental para potenciar o fortalecemento e a
excelencia do sistema.
