Os clientes de Vodafone utilizaron ata un 28% máis os datos no móbil na rede 5G en agosto

Vodafone España fixo balance da actividade da súa 5G neste mes. Segundo fixo saber, a rede rexistrou a semana do 12 de agosto un incremento no tráfico de datos do 28% comparado coa mesma semana do ano anterior. Ademais, a rede móbil (5G, 4G, 2G) rexistrou un pico no tráfico de datos que supero os 50.000 terabytes, un 2% máis que o ano anterior, no que é un dos momentos con máis tráfico do ano.
En concreto, o tráfico de datos multiplicouse por 3 en zonas costeiras, especialmente en Alacante, Tarragona, Valencia, Xirona, Málaga, Castelló e Cádiz, e multiplicouse por 4 en zonas do interior, en concreto, nas provincias de Zamora, Teruel, Cuenca e Ávila.
As aplicacións máis utilizadas polos clientes durante o verán foron: Instagram (15%), TikTok (11,2%), Facebook (8,8%), e Youtube (8,5%), recortando distancia TikTok respecto a Instagram.
Vodafone explica que foi levado a cabo no seo da operadora “un importante esforzo á hora de reforzar a súa cobertura 5G e 4G nos principais puntos turísticos do país”, fortalecendo a rede en case 200 municipios costeiros de 10 Comunidades Autónomas, incluída Galicia, co obxectivo de “ofrecer a mellor experiencia, conectividade e velocidade de acceso a Internet aos seus clientes durante a tempada estival, tras duplicar a capacidade da rede en 1.000 praias o pasado ano”. A compañía engade que a rede “mantívose estábel durante os meses estivais, grazas ás accións de optimización e capacidade implementadas previamente, con medidas para mellorar a robustez da rede e a monitoraxe continua para atallar rapidamente calquera incidencia ou problema”.