Os clústers audiovisuais de Galicia e Aragón impulsan un proxecto de IA creativa para escenarios virtuais

luns, 6 de novembro do 2023 S. P.

O Clúster Audiovisual Galego (CLAG) e o Clúster Audiovisual de Aragón veñen de xuntar forzas para desenvolver un innovador proxecto tecnolóxico, o proxecto PLATVR: Intelixencia Artificial Creativa para platós virtuais, que impulsará o mercado XR e de Virtual Production en España e no resto do mundo.
Financiado polo Ministerio de Industria, Comercio y Turismo a través das súas axudas a agrupacións empresariais innovadoras e polos fondos europeos Next Generation EU, PLATVR representa, en palabras dos clústers, “un importante avance na optimización de recursos e tempos na produción audiovisual”. En concreto, PLATVR é un proxecto estratéxico colaborativo do CLAG, o Clúster Audiovisual de Aragón, o Instituto Tecnolóxico de Galicia (ITG) e dúas destacadas empresas do sector audiovisual, Magic Fennec e The Mo, especializadas en VFX e Virtual Production. O proxecto aborda a necesidade de reducir custes e optimizar a creación de escenarios virtuais, “unha actividade crítica na produción audiovisual tradicional que consume recursos considerábles e tempo de implementación”, explican as ditas entidades, salientando as posibilidades que abren os escenarios virtuais: “Estes platós ofrecen unha solución prometedora ao permitir rodaxes ou emisións nunha contorna controlada e a interacción con obxectos virtuais”.
Para sacarlles todo o rendemento que ofrecen é polo que xorde PLATVR, que pon o foco na xeración automática de imaxes que representen escenarios adaptados ás necesidades específicas de cada produción. Farao propondo unha investigación en modelos de Intelixencia Artificial (IA) xenerativa GAN para xerar imaxes bidimensionais baseadas en deseños existentes no mercado e en imaxes do mundo real.
Así mesmo, o proxecto enfocarase na aplicación de técnicas de IA baseadas na aprendizaxe profunda (Deep Learning) para converter as imaxes 2D seleccionadas en escenarios 3D, “o que mellorará a experiencia inmersiva ao permitir o movemento de cámaras nos escenarios virtuais”.

PUBLICIDADE