Os condutores de Vigo xa poden pagar a zona azul a través dos seus móbiles

luns, 18 de novembro do 2019 Redacción

O Concello de Vigo está a ampliar o abano de operacións e trámites que a cidadanía pode facer a través do seu teléfono móbil. Este luns puidemos saber que o Goberno municipal habilitou o pago da zona azul dos estacionamentos de pago limitados a través dos dispositivos dos condutores, unha vantaxe que os libera da necesidade de ter a cantidade axeitada de diñeiro en efectivo ou un parquímetro situado preto.
Esta funcionalidade implementada pola concesionaria do aparcamento regulado (zona XER) está dispoñíbel na aplicación Telpark, onde as usuarias e usuarios poderán recibir alertas de caducidade ou localizar o vehículo con xeolocalización (GPS), amais de ampliar o prazo de estacionamento.
Amais da devandita novidade e como iniciativa complementaria, o alcalde Abel Caballero avanzou hoxe a súa vontade de ampliar até as catro horas o período máximo de estacionamento (de dúas horas neste momento) para o que se procederá á modificación da ordenanza. Ao citado, dixo, cómpre engadir a posibilidade de usar a tarxeta Passvigo como medio de acceder ao servizo e a progresiva implantación de 27 postes de recarga de vehículos eléctricos. Caballero tamén adiantou que os novos parquímetros disporán de recarga eléctrica para dispositivos móbeis, amais de incluír un servizo de información cidadá con temas ligados ao tráfico, entre outros.

PUBLICIDADE