Os enxeñeiros en Informática esixen a Inditex un recoñecemento ao traballo dos profesionais galegos
luns, 3 de outubro do 2011
- Fernando Suárez, presidente do CPEIG
O Colexio Profesional de Enxeñaría en Informática
de Galicia, CPEIG, vén de expresar o seu
malestar con respecto ao que considera un novo caso de desleixo no que se
refire ao recoñecemento do traballo feito polos profesionais aos que dá
acubillo e a fin de contas representa. Segundo conta co colexio, esta nova
reclamación diríxese especificamente ao grupo Inditex, arestora mergullado na
posta en marcha das tendas en liña das cadeas que integran o grupo. Así, a
entidade profesional que preside Fernando Suárez xa lle enviou á empresa téxtil
unha carta na que lle manifesta o desacordo dos membros colexiais coas
declaracións efectuadas recentemente polo grupo, unhas declaracións que daban a
entender que na nosa terra non había preparación nin profesionalidade tecnolóxica
de abondo, cousa que o CPEIG considera “un
agravio aos profesionais galegos”.
Máis polo miúdo, o comunicado de Inditex viña a
dicir que o feito de que radique a facturación dos seus novos negocios en liña
en Irlanda responde ao feito de que alí “localízase
o coñecemento, experiencia e os recursos tecnolóxicos propios do comercio
electrónico”.
A xuízo do CPEIG, esas declaracións representan “un desprezo inaceptable cara ao sector das
TIC galego e rozan o insulto aos moitos centos de profesionais do noso sector,
na súa grande maioría galegos, que durante os últimos meses deron todo o seu
tempo e esforzo, tanto contratados por Inditex como polos moitísimos provedores
de TIC implicados, para levar adiante esta experiencia en liña, que está a
resultar moito máis exitosa do que a propia empresa nunca imaxinou”.
E continúa: “A
meirande parte dos coñecementos, a experiencia e os recursos tecnolóxicos desas
tendas en liña, tanto dos frontais web coma da enorme infraestrutura loxística
que existe por detrás, non procede de Irlanda (onde si están os servidores e a
empresa que factura), senón de Galicia, así como doutras partes de España,
aínda que en moito menor medida”.
Segundo engade o Colexio, non é preciso que se lle
lembre ao Grupo que mesmo os almacéns centrais que distribúen a mercadoría están
fóra de Galicia e incorporan unha boa cantidade de tecnoloxía desenvolvida na
comunidade galega para a súa operativa.