Os estudantes expertos en robótica do IES de Brión, homenaxeados polo seu Concello
venres, 19 de febreiro do 2016
A
rapazada de Brión acadou importantes recoñecementos nas pasadas
edicións de Sensores
para Todos e do
OSHWDem, a 2015, e o seu Concello quixo tamén celebralo como se
merece. A homenaxe escenificouse este xoves 18, precisamente, na casa do
consistorio local, nun acto no que participaron os 22 estudantes do
IES Brión (primeiro de Bacharelato e cuarto da ESO) que trunfaron
nos concursos de robótica dos certames Sensores e OSWDem, e
tamén o alcalde José Luís García, e máis a concelleira de
Ensino, Iolanda Bouzas. “Como sigades así, o Val da Amaía moi
axiña lle vai facer a competencia ao Sillicon Valley”, sinalou o
rexedor.
O alcalde
brionés felicitou aos rapaces e rapazas por “facer realidade un
dos desexos tanto deste alcalde como dos directores do voso centro:
dar a coñecer o enorme talento que hai en Brión”. Asemade,
ironizou coa idea de ter perdido a conta dos premios extraordinarios
de Bacharelato que suma o IES Brión: “Os rapaces e rapazas da
Radio EmBrión van camiño de saír no EGM, o grupo de teatro triunfa
onde vai, e agora os alumnos de Tecnoloxía Industrial e Debuxo
Técnico vos poñedes a fabricar robots e gañar campionatos
competindo con institutos de cidades con máis estudantes que
habitantes ten Brión”.
José
Luís García salientou que estes éxitos son posíbeis grazas á boa
formación que se imparte no IES brionés, “e iso hai que
agradecerllo especialmente a todo o equipo educativo do instituto,
pero tamén ao voso traballo porque só con coñecementos non se fai
nada, tamén é precisa unha importante dose de esforzo e traballo
pola vosa parte para sacar todo adiante”. Neste sentido, instou aos
rapaces a seguir adiante para “buscarlle aplicacións prácticas a
estes traballos” porque “nun mundo no que os drons están cada
vez máis presentes, quen vos di que o voso robot que detecta zonas
escuras non vaia ser utilizado para revisar o alumeado público?”.
Pola súa
banda, Xabier Lorenzo, profesor de Tecnoloxía Industrial e Debuxo
Técnico, agradeceu o apoio recibido dende o Concello e apuntou que
“eu sempre lles insisto en que teñen que ter presente a aplicación
práctica do que fan, porque están aprendendo a facer cousas e
despois poden chegar a desenvolver máis”.
Luz
Ramos, profesora de Tecnoloxía, agradeceu o apoio recibido para
poder presentarse a estes concursos “e a algún outro que temos en
mente”.
Como
lembraremos, o alumnado de Tecnoloxía Industrial e Debuxo Técnico
de 1º de Bacharelato obtivo este mes de febreiro o primeiro premio
do concurso Sensores para todos, organizado por IGACIENCIA en
colaboración coa Secretaría Xeral de Política Lingüística. O
traballo premiado consistía nun sensor localizador de zonas escuras
que combina unha pequena cámara, unha placa Arduino, unha Raspberry
Pi e diversos compoñentes electrónicos montados sobre unha
estrutura con tracción de seu. O aparello ideado, deseñado,
construído e programado polos rapaces e rapazas do IES Brión.
Neste mesmo certame, o alumnado de Tecnoloxía de
4º da ESO recibiu unha mención especial polo conxunto dos seus
traballos: barra de LED, lámpada de cores, creatopads
e new wave beep.
Tres meses antes, estes mesmos alumnos acadaron
catro dos seis premios en disputa na Competición Escolar de Robótica
OSHWDem 2015, na modalidade Segueliñas,
celebrada na Coruña. Nesa competición participaron catro equipos:
tres de 4º da ESO na categoría Renacuajo,
cuxos robots coparon as tres primeiras posicións; e un de 1º de
Bacharelato, cuxo robot acabou 2º na categoría xeral. Neste caso,
os robots construídos tiñan que seguir o máis fielmente posible un
percorrido marcado cunha liña de cor negra de 2 centímetros de
ancho sobre un fondo branco e completamente liso.