Os futuros Mac mini dirían adeus aos portos USB-A

Os actuais Mac mini sorprendían polas súas grandes dimensións, xa que o seu interior está case baleiro, xa que a súa placa actual ten un tamaño moi compacto

A unha semana da nova presentación de Apple, na que presentarán o novo iPhone, dispáranse as informacións sobre outros produtos que poderían presentar na mesma data, suxerindo que os equipos informáticos con procesadores M4 poderían quedar para unha presentación posterior, distanciando así os lanzamentos, de xeito que en novembro chegarían ao mercado varios modelos novos de MacBook Pro e un Mac mini redeseñado.
O novo Mac mini é o produto que está a provocar máis expectación, xa que dende a adopción dos procesadores Apple Silicon o público esperaba unha renovación do seu deseño, pois resultaba moi rechamante que mantivese unha carcasa propia dun procesador Intel, con moitísimo espazo baleiro no seu interior.
Actualmente os Mac mini teñen unhas dimensións de 19,7 x 19,7 x 3,58 centímetros, e o máis probable é que os novos equipos teñan unhas dimensións semellantes ás do Apple TV 4K (9,3 x 9,3 x 3,1 centímetros), pero as últimas filtracións realizadas por Mark Gurman a través de Bloomberg, son moi interesantes por un detalle moi propio da compañía da mazá: os novos Mac mini contarían con conectores USB-C pero prescindirían dos USB-A.
Os portos USB-A están aínda moi presentes en ordenadores de sobremesa e portátiles por motivos de compatibilidade, para así poder seguir a empregar accesorios que non sexan moi recentes, polo que a súa erradicación no Mac mini é un paso decisivo para acelerar a desaparición dos vellos conectores (e probablemente anticiparían a desaparición dos portos USB-A do Mac Pro e o Mac Studio).
Tamén comentan que o redeseño do Mac mini incluiría versións con procesador M4 Pro (polo que o tamaño podería non ser tan compacto como o do Apple TV) e tal versión contaría con 3 portos USB-C traseiros e 2 frontais, mantendo conector para auriculares, saída HDMI, conector Ethernet e fonte de alimentación interna.
Outro comentario interesante é que por fin se superarían os 8 GB de memoria RAM como mínimo, pasándose a 12 ou 16 GB, en grande medida para facilitar o traballo con Apple Intelligence no futuro.