Os grandes partidos políticos adoitan crear en Twitter comunidades dispersas
venres, 12 de xaneiro do 2018
As contornas políticas máis tradicionais xeran
en Twitter comunidades dispersas. Esta, en liñas xerais, é
unha das conclusións que se pode tirar do estudo sobre redes sociais
e partidos polo realizado polo profesor da Facultade de Ciencias
Sociais e da Comunicación Xabier Martínez Rolán, e maila
investigadora da Universidade da Coruña Teresa Piñeiro. En
termos máis concretos, o seu traballo buscou afondar na estrutura
xerada en Twitter polas principais formacións políticas en Galicia
durante a campaña das eleccións municipais de 2015.
O estudo, recollido nun artigo da revista El
Profesional de la Información, amosa como os “partidos
tradicionais”, PPdeG e PSdeG, artellan en Twitter “comunidades
dispersas”, nas que a interacción coa “conta matriz”, o perfil
autonómico, vese complementada por “grupos de usuarios que
interactuan co partido de maneira indirecta”, o que é reflexo,
explica, “do seu asentamento local e a fortaleza da súa estrutura
política”.
Este modelo foi tamén o que definiu a actividade
de Podemos Galicia durante estes comicios, mentres que formacións
como EU e Ciudadanos presentan “redes xerárquicas” na que a
relación co perfil da formación é máis directa. O BNG, pola
contra, constituíu neste estudo o único caso de “rede
heterárquica”, aquela na que se produce unha maior “conectividade”
entre as diferentes comunidades de usuarios. Segundo engade Xabier
Martínez, “as eleccións municipais son as que temos máis
próximas, nas que podemos dirixir aos candidatos ou candidatas de
maneira máis sinxela, porén son as menos estudadas”, sinala este
investigador, que no artigo Lazos invisibles de la comunicación
política. Comunidades de partidos en Twitter en unas elecciones
municipales, buscaba analizar a rede de relacións que “se
tecen arredor dos partidos políticos nun contexto electoral
municipal”, a partires da análise de 53.000 chíos publicados
entre 0 20 de abril e o 31 de maio de 2015.