Os graos TIC da UVigo obteñen o selo internacional de calidade SIC
venres, 24 de maio do 2019
As
enxeñarías de Informática, Forestal e Tecnoloxías de
Telecomunicación da Universidade de Vigo veñen de acadar
importantes recoñecementos á súa excelencia educativa e
investigadora. Máis
polo miúdo, foron obxecto de cadanseu selo internacional de calidade
SIC, os certificados que outorga a Axencia Nacional de Avaliación da
Calidade e Acreditación (ANECA) ás entidades que acreditan o
cumprimento dos estándares europeos nos seus respectivos ámbitos da
enxeñaría.
En
concreto, recibiron a dita distinción o Grao en Enxeñaría
Informática da Escola Superior de Enxeñaría Informática do Campus
de Ourense, o Grao en Enxeñaría Forestal da Escola de Enxeñaría
Forestal do Campus de Pontevedra e o Grao en Enxeñaría de
Tecnoloxías de Telecomunicación da Escola de Enxeñaría de
Telecomunicación do Campus de Vigo. Estas son as primeiras
titulacións de grao en Enxeñaría Informática, Forestal e de
Telecomunicación do Sistema Universitario de Galicia (SUG) en seren
recoñecidas con esta distinción.
A
entidade que xestiona e certifica en España este selo SIC é a
ANECA, que está acreditada por European Accreditation of
Engineering Programmes para estas tarefas. O programa SIC ofrece
a posibilidade de obter un selo de recoñecido prestixio en varios
ámbitos do coñecemento. Actualmente desenvólvese sobre todo nos
ámbitos das titulacións de enxeñaría (selo EUR-ACE) e das de
informática (selo EUR-INF).
As
tres escolas subliñaron a importancia deste recoñecemento porque
atende a “estándares de calidade, relevancia, transparencia,
recoñecemento e mobilidade contemplados no Espazo Europeo de
Educación Superior para as enxeñarías”, como destaca Íñigo
Cuiñas, director da EE de Telecomunicación.
Entre
outras cuestións, tivéronse en conta os resultados de aprendizaxe
definidos no plan de estudos e se os egresados e egresadas do título
acadan estes resultados establecidos pola axencia europea de
calidade. Tamén se valorou o soporte institucional del título para
o desenvolvemento do programa formativo.
A
obtención do selo EUR-ACE para o Grao en Enxeñaría de Tecnoloxías
de Telecomunicación supón para a Escola de Enxeñaría de
Telecomunicación “un recoñecemento internacional para a forma na
que facemos as cousas, e máis obténdoo sen prescricións xa no
primeiro informe provisional”.
Pola
súa banda, Juan Picos e Ángeles Cancela, director e subdirectora da
EE Forestal, salientan que o certificado “non só distingue o
centro, senón que distingue aos nosos egresados, calquera persoa que
saia desta escola, faino cunha acreditación europea como enxeñeiro”.
Amais,
Francisco Javier Rodríguez, director da Escola Superior de Enxeñaría
Informática do Campus de Ourense, destaca a satisfacción do seu
centro por acadar que “o noso Grao en Enxeñaría Informática sexa
o primeiro de Galicia en obter este selo de calidade EURO-INF”.