Os iMac incorporan procesadores M3

A presentación da nova familia de procesadores M3 estaba claramente asociada a novos equipos informáticos da compañía da mazá, sendo a máis agardada a do iMac con pantalla de 24 polgadas, que sorprende por estrear modelos con procesador M3 sen ter pasado por un procesador M2, polo que a mellora con respecto aos anteriores iMac é notable.
Estamos ante uns novos iMac que practicamente non tiveron cambios máis aló do salto de procesador, que pasa dun M1 a un M3, pois seguen a ter unha excelente pantalla Retina 4,5K de 24 polgadas, bos altofalantes e micrófonos e incluso un detalle bastante desagradable: o Magic Mouse e o Magic Keyboard non se actualizaron, de xeito que para recargar as súas baterías hai que empregar un adaptador de USB-C a Lightning (o que será unha molestia a longo prazo).
Estes equipos chegarán ao mercado o vindeiro día 7 con CPU de 8 núcleos, GPU de 8/10 núcleos, entre 8 e 24 GB de memoria unificada e entre 256 GB e 2 TB de almacenamento interno, quedando o seu prezo entre os 1.619 euros de partida e os 3.229 euros do modelo máis completo.
O rango de prezos destes equipos está a ser moi criticado, pois Apple está a cobrar a ampliación de 512 GB de SSD a 2 TB de SSD a 690 euros, cando unha unidade SSD de 2 TB de alta velocidade custa actualmente pouco máis de 100 euros, polo que a sensación de que estamos ante un abuso por parte da compañía de Cupertino é inevitable.