Os investigadores da UVigo dan conta da súa experiencia co satélite de observación solar da ESA
mércores, 11 de marzo do 2020
Este
martes pola tarde, 10 de marzo, celebrouse
na Escola de Enxeñaría Aeronáutica e do Espazo do Campus de
Ourense unha nova edición do Foro Aero, espazo de debate e
intercambio de coñecemento arredor dos principais achados dos nosos
investigadores en satélites, picosatélites, drons, UAV e demais
prometedoras tecnoloxías aeronáuticas e aeroespaciais. Unha parte
relevante do contido xirou arredor do satélite de observación Solar
Orbiter, no que participan profesores e investigadores da
Universidade de Vigo.
Máis
polo miúdo, a cita contou coa intervención dos profesores Antonio
Ferriz, do Departamento de Física Aplicada, e de Fermín Navarro, da
Área de Enxeñaría Aeroespacial. Segundo fixeron saber, Solar
Orbiter (SolO) é un satélite científico de observación solar
desenvolvido pola Axencia Espacial Europea (ESA) coa colaboración da
NASA e lanzado en febreiro de 2020 co obxectivo, segundo a ESA, de
observar “rexións ata agora descoñecidas do sol, incluídos o
seus polos”, e desvelar algúns dos grandes segredos que restan por
descubrir do astro rei, como a formación do vento solar ou a orixe
do seu campo magnético.
Antonio
Ferriz explicou durante a súa intervención como desde o ano 2008
forma parte do grupo de investigación Física Solar do Instituto de
Astrofísica de Andalucía, en Granada. Este grupo, indicou, “adícase
fundamentalmente ao estudo dos campos magnéticos solares desde tres
puntos de vista: o teórico, o observacional e o instrumental”. En
relación coa parte instrumental, detallou, o grupo de Física Solar
ocupouse no proxecto Solar Orbiter do deseño, desenvolvemento e
construción do instrumento SO-PHI (Polarimetric and Heliosismic
Imager for Solar Orbiter).
Ferriz
tamén fixo saber que SO-PHI é o instrumento “máis grande e
importante dos dez que forman parte dos experimentos da misión
espacial Solar Orbiter”, e ten o cometido de medir o campo
magnético solar e as velocidades do plasma na fotosfera solar.
No
desenvolvemento deste instrumento tamén estiveron involucrados o
Instituto Max-Planck de Investigación do Sistema Solar (Göttingen)
e o Instituto de Física Solar de Friburgo, ambos en Alemaña.
Pola
súa banda, Fermín Navarro, profesor tamén da Escola de Enxeñaría
Aeronáutica e do Espazo do Campus de Ourense, explicou como desde
2007 ata 2013, mentres traballaba no Instituto de Microgravedad
Ignacio da Riva da Universidade Politécnica de Madrid, participou no
deseño do control térmico de varios instrumentos que se atopan a
bordo de Solar Orbiter, agrupados co nome de Energetic Particle
Detector, durante distintas fases da misión. “Entre eles, no
que tiven máis dedicación foi no de Electron Proton
Telescope-High Energy Telescope, facendo ademais do deseño do
control térmico do instrumento, a validación do modelo térmico cos
resultados dos ensaios en cámara de baleiro-térmica”, explicou o profesor.