Os novos auriculares de Nothing integran micrófono no estoxo de carga

Nothing presentou os seus novos auriculares sen fíos Ear (3), que chegan ao mercado con melloras substanciais no son, na cancelación de ruído e no deseño. Estarán dispoñible en branco e negro a partir do 8 de outubro a un prezo de 179 euros.
En materia de audio, os Ear (3) incorporan un transdutor dinámico mellorado de 12 mm, con graves ata un 6 % máis potentes e agudos un 4 % máis brillantes que a xeración anterior.
Ademais, ofrecen compatibilidade con LDAC Hi-Res de 24 bits e tecnoloxías como Static Spatial Audio, que crea un escenario sonoro tridimensional, e Dynamic Bass Enhancement, que amplifica en tempo real as frecuencias máis baixas.
A cancelación de ruído adaptativa analiza o entorno cada 600 milisegundos para axustar automaticamente a experiencia de escoita chegando a suprimir ata 45 dB de ruído. Cando se precisa maior atención ao exterior, o modo transparencia permite escoitar o que acontece arredor.
En termos de autonomía, cada auricular integra unha batería de 55 mAh que garante ata 5,5 horas de reprodución con cancelación activa activada.
O estoxo, fabricado con aluminio reciclado e carga sen fíos, eleva a duración total ata 38 horas. Cunha carga rápida de dez minutos por USB-C é posible obter ata dez horas de uso adicional.
O deseño dos novos auriculares mantén a estética transparente característica da marca, reforzada cunha antena de metal pulido que mellora a recepción. A ergonomía tamén foi optimizada tras múltiples probas, cun axuste cómodo e estable. Os auriculares e o estoxo contan ademais con certificación IP54 contra auga e po.
Os Nothing Ear (3) inclúen funcións como emparellamento rápido en Android e Windows, personalización a través da aplicación Nothing X e compatibilidade con asistentes de voz.

Super Mic: o estoxo con micrófono

Pero un dos elementos máis destacados destes auriculares é o sistema Super Mic, integrado no estoxo de carga, que permite captar a voz do usuario e reducir o ruído ambiental ata 95 dB. Deste xeito, chamadas e notas de voz poden manter unha claridade case total, mesmo en contornos ruidosos, xa que o micrófono pode achegarse á boca do usuario, conseguindo unha recepción moi superior á dun micrófono situado á altura da orella. Esta función pode ser moi ben recibida por certo tipo de usuario afeito a falar directamente ao micrófono inferior do móbil, que así pode trasladar o hábito aos auriculares sen fíos.