Os novos métodos estatísticos aplicados ao Big Data centran un curso do CiTIUS
xoves, 3 de xaneiro do 2019
Estes
días estase a desenvolver no centro CiTIUS da USC un relevante curso
sobre as vantaxes e utilidades do programa estatístico R, software
libre moi estendido entre a comunidade investigadora internacional de
calquera vertente e con grandes potencialidades para o manexo de
grandes cantidades de datos (o que se coñece como Big Data).
Estamos
a falar do programa de formación Curso de métodos estatísticos
dirixido ao estudo de tests paramétricos e non paramétricos.
As sesións comezaron en
novembro no salón de actos do CiTIUS e estanse a estender por este
mes de xaneiro (días 8, 11, 15, 18, 22 e 25).
A
encargada de impartir os contidos é Beatriz Pateiro López, doutora
e profesora do Departamento de Estatística, Análise Matemática e
Optimización da Universidade de Santiago.
O
obxectivo do curso é familiarizar aos participantes cos métodos
máis importantes de inferencia estatística básica, poñendo o foco
nos contrastes de hipóteses paramétricos e non paramétricos. O
enfoque será de carácter aplicado con ilustración sobre datos de
interese e manexo da ferramenta estatística R.
A
metodoloxía empregada ten un enfoque práctico. Deste xeito, a
partir do primeiro capítulo de análise exploratoria de datos,
tirarase proveito destes como “motivadores” para a introdución
dos diversos contrastes e irase mostrando a implementación dos
mesmos no computador coa axuda de R.
Como
lembraremos, R é un software orixinariamente deseñado para a
análise estatística e a realización de gráficos e que nestes
intres estase a utilizar en numerosos eidos relacionados coa
estatística (xenómica, biomedicina, econometría, Big Data,
bioloxía, ...). R ten unha natureza dupla de programa e de linguaxe
de programación e distribúese baixo licenza GNU-GPL.