Os operadores de baixo custo tamén permiten beneficiarse dos bonos sociais dixitais

luns, 28 de novembro do 2022 Marcus Fernández

JPEG - 36.5 KB
Lowi é un dos operadores de baixo custo que permiten beneficiarse do bono dixital para a conectividade de colectivos vulnerables

Dende a semana pasada é posible solicitar os novos bonos dixitais para a conectividade de colectivos vulnerables, figurando entre as compañías que actualmente colaboran con esta iniciativa Telefónica, Vodafone, R, Itegal e A túa Xanela, pero esta relación de operadores sería máis ampla do que parece, pois os operadores de baixo custo de Vodafone (Lowi) e Telefónica (O2), opcións que poden resultar especialmente atractivas para os cidadáns que poden optar por esta liña de axudas, xa que canto menor sexa a tarifa mensual mellor se percibirán os 20 euros de desconto ao mes dos que poden beneficiarse durante 12 meses.
Para beneficiarse do bono dixital os cidadáns poden acudir á súa oficina municipal de asistencia social, ou solicitalo directamente a través da Sede Electrónica da Xunta de Galicia, e unha vez concedido, o cliente pode contactar co operador que elixa dos que colaboran co programa para solicitar a alta no produto de fibra ou de fibra e móbil que desexe. No caso de Lowi os interesados poden chamar ao teléfono 956 920 585 ou mandar un correo electrónico, mentres que os interesados en contratar con O2 poden chamar ao 1551.
Está previsto que os bonos sociais dixitais poidan beneficiar a 5.744 familias galegas, que terán así máis facilidades para gozar de conexión fixa de acceso á Rede a unha velocidade mínima de 30 Mbps, e que os operadores de baixo custo estean abertos á iniciativa fai máis doada a contratación de conexións a un prezo reducido. No caso de Lowi a compañía ofrece conexións de fibra de 300 Mbps a 24,95 euros/mes e no caso de O2 custarían 27 euros/mes, pero incluíndo liña telefónica con chamadas ilimitadas a fixos e móbiles nacionais.

PUBLICIDADE