Os portais de transparencia xa están presentes no 96% dos concellos da nosa terra
xoves, 17 de outubro do 2019
A
Administración Electrónica avanza a bo paso entre os nosos
concellos, chegando estes a acadar importantes porcentaxes de
transformación tecnolóxicos en parámetros como a presenza de
portais de transparencia, que están presentes xa no 96% dos mesmos.
Así
o vén de dar a coñecer a Rede Locais, xestionada polo grupo de
investigación Governance and Economics Research Network (GEN)
da UVigo, que presentou este mércores en Santiago a segunda edición
do seu Estudo sobre a a situación dos portais de transparencia
local en Galicia. O documento reflicte unha “evolución
claramente positiva” dos entes locais en materia dixital,
participativa e transparente.
O
acto, celebrado na FEGAMP, contou coa participación de Alberto
Vaquero, co-director de Localis; Alfredo García, presidente da
FEGAMP; Natalia Prieto, directora xeral de Avaliación e Reforma
Administrativa da Xunta, e Marta Fernández, directora xeral de
Administración Local.
O
informe, no que se fai comparativa cos datos de 2017, recolle como
dixemos que en 2019 a porcentaxe de concellos cun portal de
transparencia sitúase no 96%, polo que “só once concellos galegos
non contan con este instrumento, polo que a evolución é claramente
positiva”.
En
relación á accesibilidade para a procura da información,
destácanse tamén “bos resultados”, indicando como este ano o
88% dos concellos galegos teñen na súa web unha ligazón ao portal
de transparencia ou á sede electrónica, “facilitando deste xeito
un maior coñecemento á cidadanía en xeral”.
En
relación á utilización das distintas plataformas de transparencia
(propias, estatais, autonómicas ou provinciais) indican dende
Localis como “en 2019 só un 4% dos concellos galegos non utiliza
ningún portal de transparencia, un 68% usa un só, e un 28% utiliza
dous portais”, destacando “o importante esforzo por implantar os
portais de transparencia nos concellos das provincias de Ourense e
Pontevedra”.
Segundo
engade o documento, “o tamaño dos concellos condiciona os
resultados” e as “grandes cidades contan todas cun portal de
transparencia, pero a medida que descende a taxa de poboación as
porcentaxes van caendo”. Así, detállase, “os concellos con máis
habitantes optan por un portal de transparencia de seu (100% se a
poboación é maior dos 50.000 habitantes) (en 2017 e 2019), e un 42%
(en 2017) e un 54% (en 2019) se o concello se atopa entre os 20.001 e
50.000 habitantes, mentres que os pequenos só optan no 7% dos casos
por un portal propio”.
Na
investigación tamén se avalía o cumprimento dos indicadores da Lei
de Transparencia, Acceso á Información Pública e Bo Goberno de
2019, apuntando cuestións como que o 88,8% dos concellos galegos
cumpren coa necesidade de publicar información relativa ás funcións
que desenvolven, á normativa que lles sexa de aplicación e á súa
estrutura organizativa (empregados públicos, titulares das
alcaldías, etc).