Os portátiles do proxecto OLPC evolucionarán en tablets

luns, 9 de xaneiro do 2012 Marcus Fernández

O proxecto One Laptop per Child (OLPC), que busca achegar equipos informáticos de baixo custo a cativos de países emerxentes, pese a parecer máis morto que vivo, continúa na procura da innovación para conseguir os seus obxectivos, e agora anticipa no Consumer Electronics Expo (CES) de Las Vegas o que será o seu XO 3.0, que en vez de presentarse como un ultraportátil toma a forma de tablet.
O XO 3.0 pretende ser un tablet económico, de baixo consumo (podería recargarse con paneis solares) e reforzado, para resultar axeitado para o seu uso nas aulas de todo o mundo, cun deseño, desenvolvemento e resistencia que o converterían nun sucesor natural dos portátiles actuais distribuídos a través do proxecto OLPC.
Entre as tecnoloxías empregadas está o seu procesador Marvell ARMADA PXA618, que contribúe a manter o seu baixo consumo, e que xa está presente no XO 1.75, actual portátil que comezará a distribuírse no mes de marzo e que contará cunha pantalla (con tecnoloxía Pixel Qi) capaz de lerse baixo a luz do sol.

O OLPC XO 3.0 persegue ser un tablet resistente e válido para escolares de todo o mundo

PUBLICIDADE