Os premios do Concurso Talento Maker entregaranse no marco dos encontros Decembro Maker Talks
venres, 9 de decembro do 2022
A
Escola
Superior de Enxeñaría Informática do Campus
de Ourense acollerá os días 16 e 17 os encontros de cultura dixital
Decembro
Maker Talks, organizados
pola Deputación de Ourense no marco do proxecto transfronteirizo
Emprende Makers. O evento centrarase na innovación e a tecnoloxía,
“desde unha perspectiva didáctica e práctica”, informaron
fontes da UVigo e da dita entidade provincial, engadindo que neste
escenario abordaranse temas como a Internet das cousas, a robótica,
a impresión 3D, a ciberseguridade e os videoxogos. Un dos pratos
fortes do programa será a resolución do Concurso Talento Maker para
futuras e futuros especialistas en tecnoloxías abertas.
O
panel de convidadas e convidados inclúe membros do coworking
e coliving rural Sende; do Laboratorio Digital Fab Lab de
León; da Asociación Española de Empresas Desarrolladoras de
Videojuegos e da Asociación Galega de Videoxogos e Contidos
Interactivos; e de PlayStation Iberia e de Multiversial, Ilux e
Virtual Voyagers. Tamén estarán expertos como Antonio Fernandes,
avaliador de proxectos de innovación e ciberseguridade para a
Comisión Europea ou Cristian Espartaco, general manager
en España e Latinoamérica do club Qlash.
Como
dixemos, na sesión entregaranse tamén os premios do Concurso
Talento Maker. Trátase dunha iniciativa que nace co obxectivo de
identificar as iniciativas creativas e participativas que se están a
desenvolver en Galicia e o norte de Portugal, e en concreto na
provincia de Ourense as que contribúen ao cumprimento dos obxectivos
fixados na estratexia do programa Emprende Makers. Os galardóns
están dirixidos aos mozos con idades comprendidas entre 12 e 30
anos, con tres categorías:
-Junior Makers; Estudantes de 1º a
3º de ESO.
-Teen Makers: Estudantes de 4º de
ESO, 1º e 2º de Bacharelato ou FP ata as 17 anos.
-Sénior Makers:
Poderán participar estudantes de FP e Universidades, así como
rapaces con habilidades e intereses makers non matriculados en
ningún centro de formación, con idades comprendidas entre 18 e 30
anos.
Poderanse presentar proxectos encadrados en catro
áreas argalleiras, e que competirán entre si: robótica, impresión
3D, videoxogos e software e aplicacións móbiles ou de sobremesa.
Decembro
Maker Talks forma parte do proxecto Emprende Makers, aprobado na
segunda convocatoria do programa Interreg V A España-Portugal
(Poctep) 2014-2020 e co-financiado nun 75% polo Fondo Europeo de
Desenvolvemento Rexional (FEDER). Liderado polo Concello de Ourense,
Emprende Makers ten como entidades beneficiarias, na parte galega, á
Secretaría Xeral de Emprego da Xunta de Galicia, á Deputación de
Ourense e á Universidade de Vigo, e por parte lusa ás cámaras
municipais de Paredes de Coura, Melgaço e Vila Nova de Famalicão e
á Universidade do Minho.