Os préstamos na plataforma de libros electrónicos GaliciaLe chegaron aos 113.000
martes, 11 de xaneiro do 2022
A
Consellería de Cultura e Educación fixo balance da actividade das
bibliotecas públicas xestionadas pola Xunta no ano que vimos de
despedir. Segundo se indica no informe, publicado coincidindo co Día
das Persoas Usuarias da Bibliotecas, aquelas realizaron máis de
700.000 préstamos ao longo de 2021, o que representa un incremento
do 30% con respecto ao ano anterior.
No
conxunto, en toda a Rede de bibliotecas de Galicia, formada por máis
de 300 centros bibliotecarios públicos existentes no territorio
galego, o número de préstamos de 2021 superou os 1,3 millóns. A
estes engádenselle os da
plataforma de préstamo de libros electrónicos GaliciaLe, con
máis de 113.000, logro que segundo a Xunta “consolida o crecemento
que está a vivir nestes últimos anos o consumo deste tipo de libros
nas bibliotecas públicas autonómicas”. Trátase, de feito, dunha
cifra que duplica aos rexistrados en 2019, cando se prestaran máis
de 56.000.