Os profesores galegos de tecnoloxías lanzan críticas ao sistema educativo que prepara o Goberno central
martes, 23 de outubro do 2012
A
Asociación do Profesorado de
Tecnoloxía de Galicia (APETEGA) vén de amosar o seu
rexeitamento á Lei Orgánica para a Mellora da Calidade Educativa,
LOMCE, cuxo anteproxecto presentado polo Goberno central considera
que propón un sistema de ensino con graves eivas formativas, “ao
eliminar a educación tecnolóxica do seu seo”,
sinala o colectivo, en representación da Plataforma Estatal de Asociacións de
Profesores de Tecnoloxía (PEAPT).
Deste xeito, engade o colectivo galego, estaríase a crear un
panorama que aumentaría as cifras de fracaso escolar. A maiores,
subliñan, coa dita Lei péchaselle ao alumnado un gran número de
portas formativas, sociais e laborais.
E
máis, din, se se ten en conta “que en pleno século XXI e nun
contorno no que as tecnoloxías están presentes en tódolos eidos da
actividade humana, é imprescindible ofrecer unha cultura tecnolóxica
básica para toda a poboación”, explican os profesores
reunidos en APETEGA. Ao seu xuízo no anteproxecto sosteñen que
apenas hai cabida para a educación tecnolóxica, reducida aos tres
primeiros cursos da ESO e erradicada en cuarto e en Bacharelato. No
anteproxecto, din, cítase ás Tecnoloxías da Información e a
Comunicación (TIC), “pero non para integralas en tódalas áreas
do coñecemento, senón para reducilas a un uso simplemente
manipulativo e de lecer” .