Os repartidores de Amazon poderían empregar lentes de AR

Amazon está a preparar a súa entrada no mercado das lentes de realidade aumentada, un terreo no que Meta xa ten camiño andado. Segundo adianta The Information a compañía de Jeff Bezos traballa nun modelo de lentes para consumidores que, baixo o nome en clave Jayhawk, integrarían micrófonos, altofalantes, cámara e unha pantalla a cor nun dos ollos. A previsión é que saian á venda a finais de 2026 ou comezos de 2027, aínda que polo de agora non transcendeu o prezo previsto.
En paralelo, Amazon tamén desenvolve unhas lentes pensadas para os seus repartidores, co nome interno Amelia. Este dispositivo amosaría nas propias gafas as instrucións de entrega, indicando onde levar cada paquete. A compañía planea producir arredor de 100.000 unidades e podería lanzalas xa no segundo trimestre de 2026.
As lentes de consumo empregarán a mesma tecnoloxía de pantalla da firma chinesa Meta-Bounds, aínda que cun deseño máis lixeiro e elegante que o modelo profesional. Empresas como Meizu xa venden lentes con esa mesma tecnoloxía en China.