Os retos dos buques intelixentes centran unha nova xornada de AMTEGA e a AETG
martes, 22 de outubro do 2019
A
Axencia para a Modernización Tecnolóxica de Galicia (AMTEGA) e a
Asociación de Enxeñeiros de Telecomunicación de Galicia (AETG)
organizan o vindeiro 28 de outubro unha actividade para fortalecer na
nosa terra a Industria 4.0 no sector naval e marítimo. Estamos
a falar da conferencia Xemelgos Dixitais e o reto dos buques
intelixentes, que forma parte do programa de transferencia de
coñecemento sobre novas tendencias do convenio asinado entre ambas
entidades.
A
charla será no Auditorio Xosé Neira Vilas da Cidade da Cultura (ás
11:15h) e contará con relatorios dos enxeñeiros e directores de
Navantia, Donato Martínez Pérez de Rojas, Juan Ignacio Silvera Vez
e Carlos Blanco Seijo No evento presentarase “unha visión xeral do
plan de transformación que dará lugar ao Xemelgo Dixital no
entorno da construción naval” e abordaranse os retos e
oportunidades desta tecnoloxía e a súa implicación no ecosistema
naval e marítimo, finalizando cunha exposición dun caso de
aplicación nos futuros buques da Armada Española. A xornada está
dirixidas tanto ao sector TIC como ao resto de sectores e, tamén, á
cidadanía en xeral e ás administracións públicas. As persoas
interesadas deberán confirmar a súa asistencia enviando un correo a
comunicacion@aetg.gal
Esta
conferencia nace como unha iniciativa da Oficina Concellos xestionada
pola AETG no marco do convenio asinado con AMTEGA. A Oficina
Concellos ofrece un servizo de asesoramento e soporte especializado
sobre normativa e solucións técnicas para o despregue de
infraestruturas de telecomunicación. Calquera concello que precise
de axuda neste ámbito pode chamar ao teléfono 981 91 35 76 en
horario de luns a venres de 9:00 a 14:00h ou ben enviar a súa
consulta ao enderezo de correo electrónico
oficinaconcellos@aetg.gal.