Os segredos da metodoloxía PMI 6, ao detalle nun novo curso online de Vitae Consultores

Prosegue esta tempada a actividade da aula virtual da consultora galega Vitae, centrada máis que nunca en formar aos nosos profesionais para os grandes retos que impón unha transformación que se volve cada vez máis urxente e necesaria. Xa cos inicios da primavera, a consultora organiza a 22 edición do que xa pode ser considerado un clásico da nosa formación tecnolóxica, o Curso de Dirección e Xestión de Proxectos baixo a metodoloxía PMI 6, que achegará aos participantes unha importante oportunidade de formación para o exame de Certificación PMP do PMI.
Serán 35 horas de contidos a desenvolver os días 16, 17, 18, 23, 25 e 26 de marzo, e os días 7, 9, 14, 16, 21 e 23 de abril. O curso é unha nova oportunidade para clarificar conceptos e botar luz sobre o que semella complexo, facéndoo sinxelo e doado de comprender para todas as persoas implicadas: a posta en marcha dun proxecto tecnolóxico.
Segundo lembra Vitae, son moitos os condicionantes que inflúen negativamente no día a día dunha compañía tecnolóxica, adversidades como a crise económica, os conflitos sociais, os cambios políticos, as normas e regulamentos cada vez máis restritivos, unha meirande presión para o cumprimento dos obxectivos, a necesidade de obter máis eficiencia, ou a limitación de recursos. “En consecuencia, os proxectos non só se volven máis complexos senón tamén máis incertos, cousa que pode impactar negativamente na consecución do éxito dos obxectivos do proxecto, xa sexa en forma a adiamento no tempo, sobre-custes, corrupción do alcance, desmotivación do persoal, insatisfacción dos clientes ou deterioro da imaxe externa da organización”, explican dende Vitae, engadindo que unha parte importante destes condicionantes desaparecen se apostamos de cheo polas boas prácticas recoñecidas internacionalmente para a dirección de proxectos, que achegan un maior nivel de certeza nos mesmos, ao ofrecer aos profesionais “unha visión ampla e necesaria sobre o traballo desenvolvido”.
Neste senso, Vitae engade que “a certificación PMP acredita a persoas e xera impactos directos de valor nas organizacións”, xa que a dirección eficaz e eficiente de proxectos debe considerase como unha competencia estratéxica das empresas, xa que lles permite competir de maneira máis rendíbel e áxil nos seus mercados, sustentar á organización e responder ás consecuencias dos cambios na contorna de negocio, “axudando a cumprir os obxectos dos proxectos, a ser máis predicíbeis, a optimizar o emprego de recursos da organización e, en xeral, a actuar de maneira proactiva e non reactiva”.
Para quen non o saiba, a PMI (Project Management Institute) é a organización máis recoñecida a nivel internacional na disciplina da dirección de proxectos. Está integrada por máis de 600.000 profesionais de todo o mundo, expertos na xestión de iniciativas, con independencia do tamaño e complexidade das mesmas, en múltiples sectores industriais. Vitae recorda que “as boas prácticas aplicadas e postas en marcha polo PMI son coñecidas, recoñecidas e avaladas por milleiros de profesionais ao longo dunha chea de anos en miles de traballos de todos os ámbitos”.
En termos máis concretos, o PMI acredita aos profesionais na dirección de proxectos co certificado PMP (Project Management Professional), o cal goza dun alto recoñecemento, identificando a quen o posúe como profesional altamente cualificado e demandando, na medida en que aporta un coñecemento moi detallado para a dirección de iniciativas, anticipando problemas, xestionando proactivamente a incertidume e aumentado as probabilidades de éxito nos proxectos.
A persoa encargada de impartir os contidos será Isaac Olalla Del Real, licenciado en Dereito (Universidade Complutense de Madrid) amais de ser un profesional certificado co PMP e co PMI-RMP por parte do Project Management Institute. Trátase dun experto en xestión de iniciativas innovadoras, con máis de 15 anos de experiencia neste ámbito e preto dunha década como formador, impartindo cursos de xestión baseada na metodoloxía PMI. Polas súas actividades de adestramento xa pasaron máis de dous milleiros de persoas, formándose en xestión dunha PMO, en xestión de riscos e en xestión avanzada de proxectos. Ten traballado para Telefónica, Vodafone, Deloitte, IECISA, BT, a DXT, Bankinter, FedEx, o Ministerio de Industria, Votorantim, OHL ou a Xunta de Galicia.