Os veciños de Oza recuperan o seu pasado a través de roteiros interactivos
xoves, 1 de xuño do 2017
Medio
cento de escolares do CEIP Concepción Arenal participaron onte nun
roteiro na Coruña que tivo moito de lúdico e participativo pero
tamén de tecnolóxico. Foi unha actividade inserida na iniciativa de
dinamización social Pantasmas
de Oza, impulsada pola Asociación
Veciñal Oza, Gaiteira, Os Castros co obxectivo de recuperar e
visualizar a memoria agraria e pesqueira da parroquia de Santa
María de Oza (orixe
do barrio dos Castros e Gaiteira).
O percorrido, no que participaron veciños destes barrios, significou
a estrea dun programa roteiros guiados polos elementos desaparecidos
da contorna. Comezouse pola sede do antigo Concello de Oza na
rúa Montes e rematouse na Gaiteira, fronte ó desaparecido Ideal
Cinema. A iniciativa inclúe unha web, pantasmasdeoza.com
(dende a que
se poden consultar os indicadores do roteiro) e máis a
disposición de códigos QR nas rúas para ampliar a información,
vía teléfonos móbiles, dos elementos do percorrido.
No
percorrido os rapaces tamén descubriron onde estaba a casa de
Alejandro Ferrant no Camiño do
Corgo,
a desaparecida Estación do Norte, as pontes da Gaiteira e o Río
Monelos. Asemade, souberon do emprazamento orixinal do corralón onde
o RC Deportivo estreouse como equipo da sala Calvet en 1906.
Esta
actividade celebrouse grazas á colaboración do equipo directivo do
CEIP Concepción Arenal e a intención da asociación, despois desta
experiencia piloto, é poñela a disposición dos diferentes centros
educativos da cidade para o curso vindeiro.
O
mapa na web
Como
dixemos, a
asociación está empregar os recursos de localización da Rede para
guiar aos camiñantes a través da súa web. A intención, cos
indicadores, é “experimentar e comprender mellor a transformación
do barrio”. Para enxergalo na súa totalidade, deberemos despregar
o menú da parte superior do mapa e activar deste xeito os roteiros
dispoñíbeis. Hai dúas alternativas: unha longa de seis quilómetros
que parte de Eirís e remata nas Xubias e outra máis curta que vai
dende a antiga sede do consistorio de Oza até a praia do Lazareto.