Os xogos da Xbox orixinal comezan a ser compatibles con PC

Microsoft iniciou a despregadura de Xbox Backward Compatibility para PC, unha nova función que permitirá executar xogos clásicos da Xbox orixinal en ordenadores con Windows e en dispositivos portátiles compatibles, como as consolas portátiles ROG Xbox Ally e Xbox Ally X. A iniciativa estréase en fase inicial con catro títulos e forma parte dun plan máis amplo para preservar o catálogo histórico da plataforma e levalo progresivamente ao PC.
Os primeiros xogos compatibles son BLiNX: The Time Sweeper, Conker: Live and Reloaded, Crimson Skies: High Road to Revenge e Fuzion Frenzy. Todos eles poden adquirirse para PC e tamén están incluídos en todas as modalidades de Xbox Game Pass. Ademais, quen xa dispoña dunha licenza dixital destes xogos en consola poderá empregala tamén en PC e dispositivos portátiles.
A compatibilidade intégrase co ecosistema Xbox Play Anywhere e Xbox Cloud Gaming, de maneira que os usuarios poden acceder aos mesmos títulos desde consola, a nube, PC ou consolas portátiles compatibles sen necesidade de adquirir unha segunda copia.
A versión para PC incorpora melloras técnicas que non alteran a experiencia orixinal dos xogos. Entre elas figuran o escalado da resolución ata catro veces, compatibilidade con VSync, modos de pantalla completa e xanela, filtrado anisotrópico, antialiasing mellorado e opcións configurables de idioma e son.
Microsoft tamén confirmou que continuará ampliando as funcións desta plataforma de retrocompatibilidade. Entre as novidades previstas figura a incorporación de logros nalgúns xogos da Xbox orixinal, unha das características máis demandadas pola comunidade. Os catro primeiros títulos recibirán esta actualización nos vindeiros meses.
Para utilizar Xbox Backward Compatibility no PC é necesario contar coa aplicación Xbox para Windows e cumprir uns requisitos mínimos que inclúen Windows 11, 8 GB de memoria RAM, un procesador de catro núcleos (como un Intel Core i3-8100 ou un AMD Ryzen 3 1200) e unha tarxeta gráfica equivalente a unha nVIDIA GeForce GTX 950, unha AMD Radeon RX 550 ou unha Intel Arc A310, o que podemos entender como unha configuración bastante básica.
Esta iniciativa supón un novo paso para facilitar que os usuarios poidan seguir xogando aos títulos que xa posúen, independentemente do dispositivo que empreguen, ao tempo que contribúe á conservación do legado da marca Xbox.