Ourense acolle esta semana unha experiencia 5G para as retransmisións deportivas do futuro
mércores, 18 de maio do 2022
Esta
semana a rede 5G será na nosa terra a gran protagonista do ámbito
tecnolóxico. Serao da man de Orange e Ericsson, que presentan
en Vigo a súa rede 5G de seguridade e vixilancia para o Porto da
cidade e que ao día seguinte, xunto coa coa emprega galega Cinfo,
trasladaranse a Ourense para desenvolver no Estadio do Couto unha
experiencia deportiva de uso con esta tecnoloxía móbil. Trátase
dunha actividade ligada ao
proxecto para dotar á CRTVG dos máis avanzados recursos para a
retransmisión de eventos.
O
proxecto incluíu a despregadura dunha nova cobertura 5G na área do
Estadio do Couto (Ourense), mediante a instalación dun nodo 5G
(gNodeB), co-localizado cun nodo LTE (eNodeB) que presta servizo
nesta área. Ademais disto, no estadio habilitáronse 9 cámaras
manexadas mediante Intelixencia Artificial polo sistema de produción
automático e remoto Tiivii de Cinfo.
“Este
piloto”, informou a operadora Orange, “permitirá reducir custos
de produción, apoiar ao deporte local creando un novo modelo de
obtención de ingresos, reducir o tempo de reacción ante un evento
na instalación conectada e a posibilidade de crear outros servizos
co mesmo investimento, tanto para o emisor como para o propietario e
usuarios da instalación”.
A
demostración terá lugar o próximo día 20 de maio no Estadio do
Couto (rúa do Serán, 1G, Ourense) ás 12 horas e contará coa
asistencia de representantes da Xunta de Galicia, Red.es, TVG e das
empresas desenvolvedoras.
Para
esta experiencia mostraranse capacidades de realización usando a
rede 5G como: realización remota e/ou automática desde instalacións
do radiodifusor / híbrida (instalacións do radiodifusor e OTT),
captura 8K, realización remota desde a nube, con saída IP de alta
calidade, entre outras.
Este
proxecto enmárcase no Plan Nacional 5G, o programa para o
desenvolvemento de proxectos piloto de tecnoloxía 5G que executa
Red.es, impulsado polo Ministerio de Asuntos Económicos e
Transformación Dixital e co-financiado co Fondo Europeo de
Desenvolvemento Rexional (FEDER) e a través da UTE formada por
Cinfo, Orange, Gammera Nest e Optare Solutions.