PUBG e Street Fighter V serán os xogos de PS Plus de setembro

Os xogos que ofrecerán dentro de PlayStation Plus no mes de setembro son dous grandes referentes de cadanseu xénero, de xeito que por unha banda teremos o PlayerUnknown’s Battlegrouds (PUBG), que até a chegada de Fortnite era o battle royale de máis éxito do mercado (e continúa con moita forza en varias plataformas) e Street Fighter V, o xogo de loita máis popular para combates de un contra un.
Ambos xogos estarán dispoñibles entre o 1 de setembro e o 5 de outubro para subscritores de PS Plus, ofrecendo experiencias de xogo moi diferentes, xa que mentres en PUBG o usuario participa en competicións con até 100 xogadores, en Street Fighter V os enfrontamentos son individuais. Estes xogos tamén teñen a posibilidade de realizar compras dentro da aplicación, aínda que con Street Fighter V podería dicirse que Capcom buscou o camiño da redención, xa que o propio título permite incorporar os contidos de seguintes edicións (principalmente incorporando novos loitadores) en vez de obrigar ao usuario a mercar unha nova copia do xogo para poder gozar de todas as súas posibilidades (ou sexa, que non é preciso mercar Street Fighter V: Champion Edition para gozar dos seus contidos de balde, grazas aos progresos realizados dentro do xogo orixinal).