Pablo Lorenzo-Eiroa, un dos maiores expertos do mundo en IA e arquitectura, ofrecerá unha conferencia na sede do COAG na Coruña

A Delegación da Coruña do Colexio Oficial de Arquitectos de Galicia (COAG) celebrará o vindeiro mércores, 19 de xullo, unha conferencia cun dos maiores expertos do mundo na área de coñecemento da arquitectura e Intelixencia Artificial (IA), o arquitecto arxentino, de orixe galega, Pablo Lorenzo-Eiroa.
A conferencia, organizada en colaboración coa Asociación cultural Flor de Santiago e Viñedo Lagar do Vento, será ás 19:00 horas na sede do COAG da Coruña (rúa Federico Tapia, 64). Presentarán o acto a presidenta da Delegación de A Coruña do COAG, a arquitecta e investigadora Ruth Varela; e o secretario da Delegación de A Coruña do COAG, o arquitecto e profesor Emilio Rodríguez Blanco.
Pablo Lorenzo-Eiroa é un arquitecto e docente con proxección internacional nos ámbitos da arquitectura, o urbanismo, a ecoloxía e a computación. Impartirá a conferencia titulada Arquitectura de Arquitecturas: Creación, feudalismo dixital e Intelixencia Artificial na que presentará os últimos avances das súas investigacións sobre tecnoloxías disruptivas e arquitectura recollidos no libro Digital Signifiers in an Architecture of Information: From Big Data and Simulation to Artificial Intelligence, recentemente publicado pola prestixiosa editorial Routledge (Londres, 2023).
A obra do arquitecto Pablo Lorenzo-Eiroa innova en sistemas de representación e construción baseados en información a través de materiais, robótica e fabricación dixital. Con raíces nas cidades da Coruña e de Ferrol (a súa tía avoa vivía na rúa do Orzán 130, antes de marchar cara Bos Aires na década de 1930 onde se faría cargo do coidado do seu pai), o arquitecto denominou ao seu estudo neoiorquino, como unha homenaxe a esta orixe galega, e-Architects en referencia a Eiroa-Architects, que na súa interpretación da palabra galega Eiroa ven a significar “traballo dos arquitectos da terra”.
Pablo Lorenzo-Eiroa analizará, entre outros aspectos, a influencia da IA na práctica profesional do arquitecto e na arquitectura. Como avance, o arquitecto arxentino explica que a IA non é só unha ferramenta, senón un conxunto de ferramentas correlacionais, é dicir, máis ben “unha plataforma de procesamento de datos e de modelado emerxente correlacional paralelo”. Sinala que os datos, as grandes bases de datos e os modelos de IA no seu conxunto, constitúen, a través de estatística e algoritmos que se auto optimizan, un conxunto de ferramentas que son dinámicas e complexas.
O investigador salienta tamén que a arquitectura e os arquitectos estaban evolucionando con relación a unha arquitectura de arquitecturas, é dicir, ao desenvolvemento de ferramentas, interfaces e plataformas nas que se desenvolve arquitectura, elevando a un meta-nivel a arquitectura. “Os arquitectos teñen que desenvolver plataformas para activar datos e modelos que poidan competir coas grandes bases de datos, así como colaborar entre todos os profesionais da arquitectura para facer fronte ao feudalismo dixital”, comenta.
A conferencia abordará tamén os novos paradigmas de representación establecidos pola computación, así como o concepto de creación e autoría no desenvolvemento de tecnoloxías computacionais relacionadas coa arquitectura e, especialmente, coa recolección de datos, a información, a representación, o espazo multidimensional, as grandes bases de datos e a Intelixencia Artificial, na procura de activar unha arquitectura da información.
O doutor arquitecto Pablo Lorenzo-Eiroa é profesor asociado con Tenure, director do AI Lab e primeiro director do Master of Science in Architecture, Computational Technologies program na School of Architecture an Design no New York Institute of Technologie (NYIT).
É doutor en Arquitectura pola UIC de Barcelona, arquitecto pola Universidade de Bos Aires, onde realizou estudos de Máster e un Seminario de posgrao na Escola Superior de Belas Artes da Cárcova. Posteriormente, logrou a bolsa Fulbright e o Fondo Nacional das Artes para completar o seu M.Arch II na Universidade de Princeton. Profesionalmente, Lorenzo-Eiroa é o director de deseño da práctica experimental en e-Architects (Nova York /Bos Aires) baseada nunha Arquitectura e Urbanismo da Información emerxentes. e-Architects desenvolve software, “mapeo” de información e “visualizacións” implementando Big Data, incluíndo robótica para “debuxar” e para “construír”, entendéndoas como proto-arquitectónicas. A súa obra construída inclúe parques, edificios e instalacións en Bos Aires, Nova York e Europa.