Patricia Argerey fai unha proclama a prol da I+D+i como fórmula infalíbel para a recuperación
venres, 22 de outubro do 2021
Patricia
Argerey, directora da Axencia Galega de Innovación (GAIN),
participou este 21 de outubro no II Foro de Economía Prospectiva de
Galicia, organizado na Coruña pola Universidade Internacional
Menéndez Pelayo (UIMP). Argerey,
na súa intervención, asegurou que a Investigación, o
Desenvolvemento e a Innovación son claves para proceso de
recuperación económica, polo que instou ás empresas a
aproveitar as oportunidades ligadas a esta nova realidade para
garantir “un crecemento sostido e sustentábel”.
Argerey
afirmou que este cambio de modelo debe ir acompasado coa transición
ecolóxica e dixital, prioridades tanto a nivel europeo como en
Galicia e factores clave para impulsar a competitividade do tecido
produtivo. Neste proceso, apuntou, o papel da Administración debe
ser planificar, escoitar, innovar, executar e acompañar.
A
directora de GAIN explicou que o Goberno galego atópase actualmente
inmerso no proceso de definición da futura Estratexia de
Especialización Intelixente (RIS3) de Galicia 2021-2027, que “será
a folla de ruta das políticas de innovación nos vindeiros anos” e
dende a cal propúgnase “un modelo de desenvolvemento territorial
baseado na innovación para gañar en competitividade”. Esta
iniciativa, que parte dunha visión compartida sobre as capacidades e
potencialidades de Galicia, terá entre as súas prioridades a
transición medioambiental e dixital, así como a orientación ás
persoas.
Para
“lograr este novo modelo de desenvolvemento territorial”,
Patricia Argerey apuntou que é preciso sumar esforzos e animou a
aproveitar a oportunidade que supoñen os fondos europeos Next
Generation. Neste sentido, destacou algúns proxectos tractores
galegos que aspiran a conseguir fondos europeos, como o Polo para a
Transformación de Galicia, unha iniciativa de colaboración
público-privada que agrupa unha serie de proxectos de modernización
industrial cos que se pretende avanzar cara a transición ecolóxica,
a loita contra o despoboamento e o reto demográfico; o Polo
Aeroespacial de Galicia, que pretende consolidar o espazo tecnolóxico
e industrial creado arredor dos vehículos non tripulados na
Comunidade; o Polo de Tecnoloxías Cuánticas, co obxectivo de axudar
ao progreso do tecido produtivo e investigador a través da súa
transformación dixital; e o proxecto para impulsar a Zendal como un
dos grandes centros estratéxicos para a produción de vacinas e
produtos sanitarios, en liña coa Estratexia de Consolidación da
Biotecnoloxía en Galicia.
Argerey
asistiu logo ao evento celebrado por Everis en Oleiros para anunciar
o seu cambio de marca por NTT DATA, compañía xaponesa que adquiriu
Everis hai 7 anos. Segundo datos facilitados pola empresa, NTT DATA é
a sexta compañía de servizos de tecnoloxías da información do
mundo, está presente en máis de 50 países e conta con preto de
140.000 empregados.