Patricia Argerey reclama en Madrid apoios para o Polo Aeroespacial de Galicia a través do PERTE do sector

Patricia Argerey, directora de GAIN, nunha imaxe de arquivo de Bioga

Patricia Argerey, directora da Axencia Galega de Innovación, participou este martes 26 de xullo na reunión sobre o PERTE (Proxecto Estratéxico para Recuperación e Transformación Económica) do ámbito aeroespacial xunto coa ministra de Ciencia e Innovación, Diana Morant, amais de representantes das comunidades autónomas e dos organismos de invesatigación, empresariais e sindicais de meirande relevancia neste eido tecnolóxico e innovador. Argerey defendeu o “papel protagonista que debe ter o Polo Aeroespacial de Galicia no que atinxe ao reparto de recursos do PERTE vencellado a este sector”. Por este motivo, solicitou o apoio do Ministerio de Ciencia e Innovación para que os proxectos de I+D+i da iniciativa estratéxica do Goberno galego, especializada no segmento dos vehículos non tripulados, conten con financiamento destes fondos europeos.
Nun plano máis concreto, Argerey salientou o importante peso que ten o sector en Galicia e pon en valor que no marco do Polo Aeroespacial de Galicia se teñan investido 164M€ en proxectos de I+D+i no segmento dos vehículos e sistemas non tripulados nos últimos cinco anos; e que xa están en execución outros 84 M€ dos 540 M€ previstos na nova planificación estratéxica que se desenvolverá ata 2025, “un investimento público-privado condicionado ao acceso a financiamento europeo como é o caso do PERTE”, dixo.
A directora tamén insistiu “na necesidade de coordinación” e “de sumar capacidades e esforzos na I+D+i aeroespacial, na que Galicia ten unha posición de referencia en España”. Neste senso, lembrou que o Consorcio Aeronáutico Galego agrupa a máis de 40 empresas, centros tecnolóxicos e de coñecemento “dun sector de alta tecnoloxía que se foi consolidando nos últimos anos e que en 2021 mantivo o emprego e pechou o exercicio cun incremento de facturación do 6%”. E engadiu:” A industria aeronáutica e aeroespacial galega medrou de forma sólida e segue a ser un sector en pleno crecemento para o que os fondos europeos de recuperación, o PERTE Aeroespacial e o Polo terán un efecto positivo para acadar os seus obxectivos e situar Galicia no panorama internacional”.