Pavel Durov (Telegram) oponse ás medidas lexislativas para o ámbito dixital que prepara o Goberno

Pavel Durov, fundador e máximo responsable de Telegram, lanzou unha dura mensaxe dirixida aos usuarios da súa plataforma en relación coas iniciativas lexislativas que prepara o Goberno de España no ámbito dixital. Segundo o empresario ruso, as medidas anunciadas polo Executivo de Pedro Sánchez supoñen unha ameaza directa para a liberdade de expresión e a privacidade na Internet, ao avanzar, ao seu xuízo, cara a un modelo de control e vixilancia dos usuarios baixo o argumento da protección cidadá.
Na súa comunicación, Durov alerta de que a proposta de prohibir o acceso ás redes sociais a menores de 16 anos, acompañada dunha verificación de idade obrigatoria, non se limita á protección da infancia. Na súa opinión, a esixencia de mecanismos como o DNI ou datos biométricos sentaría un precedente perigoso, ao facilitar o rastrexo da identidade de todos os usuarios e erosionar o anonimato na rede. O fundador de Telegram considera que o que comeza como unha medida focalizada podería estenderse no futuro ao conxunto da poboación.
Outro dos puntos que critica é a introdución de responsabilidade persoal e penal para os directivos das plataformas dixitais se non eliminan con rapidez contidos considerados ilegais, odiosos ou prexudiciais. Durov sostén que esta presión legal levaría á sobrecensura preventiva, coa eliminación de calquera mensaxe controvertida para evitar sancións, o que afectaría directamente ao xornalismo, á disidencia política e ao debate público.
A mensaxe tamén pon o foco na posible criminalización da amplificación algorítmica de determinados contidos. Segundo Durov, permitir que os gobernos determinen que información pode ser promovida ou ocultada suporía a desaparición da exploración libre de ideas, substituída por contidos filtrados e controlados polo poder político. Nesta mesma liña, advirte sobre a obriga das plataformas de monitorizar e informar sobre a chamada pegada de odio e polarización, un concepto que cualifica de vago e susceptible de empregarse para cualificar críticas ao goberno como discursos divisivos.
Durov conclúe que estas iniciativas non son auténticas salvagardas, senón pasos cara a un control máis estrito do ecosistema dixital. Fronte a isto, reivindica o compromiso de Telegram coa privacidade e a liberdade dos usuarios, baseado no cifrado forte e na ausencia de portas traseiras, e chama á cidadanía española a manterse vixiante, esixir transparencia e defender os seus dereitos.
Cómpre salientar que a propia mensaxe de Durov non parece o mellor xeito de reivindicar un menor control para as plataformas como Telegram, pois estamos ante un envío abusivo dunha comunicación con intencións políticas, que incluso podería vulnerar a lexislación en materia de protección de datos.