PéZcalo ábrese a investidores externos para espallar aínda máis os seus proxectos
mércores, 6 de marzo do 2013
PeZcalo.es,
a tenda en liña galega de
produtos para pescadores deportivos, segue a ser unha fonte
inesgotábel de novidades. Agora é a quenda de falar dun
proceso aberto no seu seo para permitir a participación externa de
investidores. Segundo nos contan os responsábeis deste
establecemento, o investimento mínimo é de 5.000 euros. Esta achega
de orzamentos servirá para procurar o medre de varios proxectos ben
definidos: a propia tenda en liña (dirixida como lembraremos a
permitir que os seareiros da pesca poidan mercar de xeito sinxelo
produtos para tódolos petos), o blog
Coto de PeZca e máis o servizo Coto
de Compras, o primeiro grupo de compras en España que se dedica
a este tipo de produtos.
Con este proceso
de apertura, os responsábeis da tenda en liña achegan “a
posibilidade de participar nunha comunidade de pesca deportiva
avalada por máis de 5.000 seareiros no Facebook e 3.000 no Twitter”,
sinalan. Como lembraremos, PéZcalo estivo de novo medios
recentemente pola posta en marcha do devandito Coto
de Compras, que naceu co obxectivo de conseguir as mellores
ofertas a través das vantaxes de mercar en grupo, pero sen limitarse
a ser unha páxina web de descontos, para converterse nunha
comunidade de afeccionados á pesca deportiva.
Este novo proxecto
de PéZcalo xorde en resposta á conxuntura económica actual, de aí
que ofrezan o Coto de Compra como unha alternativa para provedores e
afeccionados á pesca de xeito que ambas partes saian gañando. Dende
o seu comezo ofrece produtos de primeiras marcas con descontos no seu
prezo de ata o 70%.