Pedro Blanco cualifica de brillante a investigación feita nas universidades galegas
martes, 14 de xaneiro do 2025
O delegado do Goberno en Galicia, Pedro Blanco, puxo en valor este martes 14 de xaneiro “o brillante futuro” da investigación feita nas universidades galegas, encarnado en Cristina Blanco, Beatriz Pelaz e Verónica Bolón, recoñecidas polo Ministerio de Ciencia, Innovación e Universidades co Premio Nacional de Investigación para Xuventude.
O delegado, xunto á subdelegada na Coruña, María Rivas, recibiu a Cristina Blanco Sío-López, a quen ambos felicitaron por este galardón na modalidade María Moliner, referente ás Humanidades. Acompañounos tamén Ricardo Cao, reitor da Universidade da Coruña.
Pedro Blanco salientou que os Premios Nacionais de Investigación do 2024 “reflicten o peso cada vez maior do talento feminino na ciencia que se fai nos centros e organismos galegos”. Por iso, fixo fincapé en que a vangarda da ciencia galega ten rostro de muller, coas investigadoras premiadas como buque insignia.
O delegado debullou “a aposta do Goberno pola ciencia e a tecnoloxía”, con medidas lexislativas como a nova Lei de Ciencia e accións prácticas centradas no impulso ás convocatorias de axudas, ao facelas máis frecuentes e dotalas de maior financiamento.
Cristina Blanco Sío-López é investigadora Distinguida Sénior María Zambrano na Universidade da Coruña e foi premiada pola súa excelente carreira científica en Historia Contemporánea. O xurado dos Premios Nacionais de Investigación destacou a súa traxectoria no ámbito internacional e os seus recoñecidos estudos sobre o proceso de integración europeo. Posúe ademais o Certificado I3 de Excelencia Investigadora e é investigadora principal do proxecto Fundeu, financiado polo Plan de Recuperación do Goberno.
Os Premios Nacionais de Investigación recoñecen o mérito daqueles investigadores e investigadoras de nacionalidade española que estean a realizar un labor destacado en campos científicos de relevancia internacional e que contribúan de forma significativa ao avance do coñecemento científico e ao progreso da Humanidade. Sobre a súa convocatoria, Pedro Blanco lembrou que no 2024 o Ministerio de Ciencia incluíu por primeira vez medidas para fomentar a presentación de candidaturas equilibradas, que reflictan a realidade da ciencia en España, na que participan homes e mulleres.