Novos móbiles de alta gama de Poco

A familia de smartphones Poco de Xiaomi está a dar un grande paso con novo Poco F7 Ultra, un smartphone con procesador Qualcomm Snapdragon 8 Elite, 12/16 GB de RAM LPDDR5X, 256/512 GB de almacenamento interno UFS 4.1, pantalla AMOLED de 6,67 polgadas cunha resolución de 3.200 x 1.440 píxeles e unha velocidade de refresco de 120 Hz, Wi-Fi 7, Bluetooth 6.0, batería de 5.300 mAh con carga rápida de 120 watts por cable e 50 watts sen fíos, especificacións que deixan claro que estamos ante todo un gama alta cun prezo de lanzamento de entre 699,99 e 749,99 euros en función das prestacións.
Pero o máis rechamante deste smartphone é o seu apartado fotográfico, que normalmente era un dos puntos máis frouxos dos móbiles Poco. O Poco F7 Ultra ten un sensor principal estabilizado Light Fusion 800 de 50 Mpíxeles, un teleobxectivo flotante de 50 Mpíxeles e un ultra grande angular de 32 Mpíxeles, así como unha cámara frontal de 32 Mpíxeles, o que en conxunto supón unha configuración de cámaras bastante superior ao que estamos afeitos nesta liña de móbiles de Xiaomi que habitualmente centrábanse na potencia do seu procesador e na súa orientación aos xogos (detalle que non abandona, como demostra o uso de tecnoloxía LiquidCool 4.0 para mellorar a súa disipación térmica).
Para usuarios menos esixentes teremos o novo Poco F7 Pro, que conta cun procesador Qualcomm Snapdragon 8 Gen 3, 12 GB de RAM LPDDR5X, 256/512 GB de almacenamento UFS 4.1, pantalla AMOLED de 6,67 polgadas, Wi-Fi 7, Bluetooth 5.4 e batería de 6.000 mAh con carga rápida de 90 watts, que fai as súas principais concesións nas cámaras, que quedan nunha traseira dual de 50 Mpíxeles con estabilización óptica e unha frontal de 20 Mpíxeles. Deste xeito conseguen que o prezo de saída deste móbil quede entre os 499,99 e os 549,99 euros. Estamos ante un smartphone que sería máis recomendable para usuarios que dean máis importancia á autonomía que ás cámaras e á potencia bruta.